საქართველო ევროპის რეკონსტრუქციისა და განვითარების ბანკიდან (EBRD) 40 მლნ ევროს სესხს მიიღებს.  საქართველოსა და EBRD-ს  შორის სასესხო შეთანხმების რატიფიცირებას დარგობრივი ეკონომიკის კომიტეტმა მხარი უკვე დაუჭირა.

მომხსენებლის, ფინანსთა მინისტრის პირველი მოადგილის გიორგი კაკაურიძის განცხადებით, საქართველოსა და ევროპის რეკონსტრუქციისა და განვითარების ბანკს შორის უკვე გაფორმებული სასესხო შეთანხმების შედეგად საქართველო 40 მლნ ევროს სესხს მიიღებს, „შენობებში მწვანე ინვესტიციების პროექტის“ დაფინანსების მიზნით, კერძოდ, საჯარო სკოლების ინფრასტრუქტურის გაუმჯობესების, მათ შორის ენერგოეფექტურობის კომპონენტის გაუმჯობესებისთვის.

ამავე პროგრამის ფარგლებში, მიმდინარე წლის ივნისში რეკონსტრუქციის ბანკსა (KFW) (მაინის ფრაქნკფურტი) და საქართველოს ფინანსთა სამინისტროს შორის ხელი მოეწერა სასესხო შეთანხმებას რომელიც აღნიშნული ბანკისგან ასევე 40 მლნ ევროს გამოყოფას ითვალისწინებს.

ფინანსთა მინისტრის პირველმა მოადგილემ განსახორციელებელი პროექტებისა და სასესხო შეთანხმების პირობების თაობაზე ისაუბრა და დეპუტატების შეკითხვებს უპასუხა.