ევროპის რეკონსტრუქციისა და განვითარების ბანკი (EBRD) დამატებით დაფინანსებას უზრუნველყოფს მყარი ნარჩენების გადამუშავების საკითხების მოსაგვარებლად ბათუმსა და სრულად აჭარის ავტონომიურ რესპუბლიკაში. აჭარის მყარი ნარჩენების მართვის კამპანიისთვის გამოყოფილი 19 მილიონ ევრომდე სესხი გამიზნულია ამ ტურისტული რეგიონის მოსახლეობისა და ვიზიტორების წინაშე მდგარი გადაუდებელი გარემოს დაცვის გამოწვევებზე რეაგირებისთვის.

3 მილიონ ევრომდე ოდენობის პირველი ტრანში მოხმარდება მყარი ნარჩენების მართვის ახალი აღჭურვილობის შეძენას. ეს საშუალებას მისცემს მსესხებელს აამუშაოს ახალი ნაგავსაყრელი და შესაბამისად, შეწყვიტოს ნარჩენების განთავსება მოქმედ, ევროკავშირის (EU) სტანდარტებთან შეუსაბამო ნაგავსაყრელებზე. 16 მილიონამდე ევროს ოდენობის მეორე, არასავალდებულო ტრანში გამოიყენება გადამტვირთავი სადგურის მოსაწყობად. ეს საშუალებას მისცემს კომპანიას გამოაცალკევოს გადამუშავებადი მასალა და გადაამისამართოს ნარჩენები ახალ სანიტარულ ნაგავსაყრელზე.

ინვესტიციის მიზანი ბათუმის (EBRD-ის ერთ-ერთი მწვანე ქალაქი), როგორც ეს განსაზღვრულია მწვანე ქალაქის სამოქმედო გეგმით (GCAP) და უფრო ფართოდ აჭარის რეგიონის პრიორიტეტულ საჭიროებებზე რეაგირებაა. ეს გულისხმობს ქობულეთსა და ბათუმში არსებულ ნაგავსაყრელებზე ნარჩენების განთავსების შეჩერებას. ეს უკანასკნელი ყველაზე დიდი და საშიში დაბინძურების წყაროა საქართველოში. ეს ნაგავსაყრელები ხმელეთის, წყლისა და ჰაერის აქტიური დამაბინძურებელია, რაც გავლენას ახდენს კონკრეტულად რეგიონის ეკოსისტემასა და ზოგადად შავ ზღვაზე.

ფინანსური პაკეტის ფარგლებში, ბანკი ასევე დაეხმარება მსესხებელს თანაბარი შესაძლებლობების შექმნაში სასწავლო პროგრამების შემუშავებით. აჭარაში ტრადიციულად ნარჩენების შეგროვების სექტორში მამაკაცები არიან დასაქმებულნი. პროექტი ხელს შეუწყობს ახალგაზრდა ქალებისა და მამაკაცებისთვის ტექნიკური უნარებისა და დასაქმების ხელმისაწვდომობის უზრუნველყოფას.

მორიგი სესხი ეფუძნება წინა ოპერაციას, რომელმაც ხელი შეუწყო აჭარაში ინტეგრირებული მყარი ნარჩენების მართვის სისტემის შექმნას და ევროკავშირის რეგულაციებთან თანხვედრაში მყოფი სანიტარული ნაგავსაყრელის მშენებლობას, რომელიც ახლახანს დასრულდა. პროექტი თანადაფინანსებული იყო შვედეთის საერთაშორისო განვითარების და თანამშრომლობის სააგენტოს (SIDA)-ს მიერ გრანტით, რომლის მოცულობა შეადგენდა 4 მილიონ ევროს. პროექტს მხარს უჭერს მდგრადი ინფრასტრუქტურის ფონდი (Sustainable Infrastructure Fund).

EBRD-მა დღეისათვის საქართველოში 5 მილიარდ ევროზე მეტი ინვესტიცია განახორციელა 280 პროექტის მეშვეობით, რომელთა 80 პროცენტზე მეტი კერძო სექტორშია. ბანკის ძირითად საინვესტიციო სფეროებია ფინანსური სექტორი, მდგრადი ინფრასტრუქტურა, წარმოება და მომსახურება და მცირე და საშუალო საწარმოები (SMEs).