ევროპის რეკონსტრუქციისა და განვითარების ბანკმა (EBRD) საქართველოს საფონდო ბირჟაზე პირველ მწვანე ობლიგაციებში 13.8 მილიონი აშშ დოლარის ინვესტიცია განახორციელა. საქართველოს განახლებადი ენერგიის ოპერაციების (GRPO) მიერ 80 მილიონი აშშ დოლარის მწვანე უზრუნველყოფილი ობლიგაციების განთავსება ამ მოცულობის პირველი კორპორაციული ემისიაა ქვეყანაში.
ობლიგაციები აშშ დოლარშია დენომინირებული 5 წლიანი ვადით და მოიცავს 7%-იან ნომინალურ შემოსავალს. ისინი გამოიცა და გაიყიდა ნომინალური ღირებულებით. ემისიას მხარი დაუჭირეს ჰოლანდიის განვითარების ბანკმა (FMO), საერთაშორისო საფინანსო კორპორაციამ (IFC), EBRD-იმ და აზიის განვითარების ბანკმა (ADB).
შემოსული თანხა მოხმარდება სს ჯორჯია კაპიტალის (GCAP) მიერ მოწოდებული აქციონერული სესხის რეფინანსირებას სს „ჯორჯია გლობალ იუთილითი-ს (GGU) 250,000,000 აშშ დოლარის ღირებულების 7.75% ევროობლიგაციების ნაწილის დასაფარად, რომლებიც 2020 წლის ივლისშია გამოშვებული. ტრანზაქცია ასევე მოახდენს GRPO-ის დაფინანსების წყაროების დივერსიფიკაციას.
ინვესტიციების მეშვეობით GRPO ასევე გადადგამს ნაბიჯებს გენდერული თანასწორობის ხელშეწყობის გზაზე ენერგეტიკულ სექტორში, სადაც მეტწილად მამაკაცები არიან დასაქმებულნი, და ჩაატარებს საინფორმაციო კამპანიას ამ სექტორში ქალთა მონაწილეობის მნიშვნელობის შესახებ ცნობიერების ამაღლების მიზნით.
GRPO, რომელიც ლონდონის საფონდო ბირჟაზე (LSE) წარმოდგენილი GCAP-ის შვილობილი კომპანიაა, წარმოადგენს განახლებადი ენერგიის ერთ-ერთ წამყვან პლატფორმას საქართველოში. კომპანია ოპერირებს ოთხ ჰიდროელექტროსადგურს და ერთადერთ მოქმედ ქარის ელექტროსადგურს საქართველოში, რომელთა საერთო სიმძლავრე 71 მეგავატს უდრის.
EBRD-მა საქართველოში დღემდე თითქმის 5 მილიარდი ევროს ინვესტიცია განახორციელა 270 პროექტის ფარგლებში, რომელთა 80 პროცენტზე მეტი კერძო სექტორზე მოდის. ბანკის საინვესტიციო ძირითადი სფეროები ფინანსურ სექტორს, მდგრად ინფრასტრუქტურას, წარმოებას და მომსახურებას, და მცირე და საშუალო საწარმოებს (SMEs) მოიცავს.