ევროპის რეკონსტრუქციისა და განვითარების ბანკმა (EBRD) თავისი სათაო ოფისი ლონდონის ბირჟის მოედნიდან Canary Wharf-ში გადაიტანა, - ამის შესახებ ინფორმაციას EBRD - ის ოფიციალურ საიტზე ვკითხულობთ. გავრცელებული ინფორმაციის თანახმად ლონდონის 2,800 თანამშრომლის ნახევარზე მეტი უახლესი ტექნოლოგიის Five Bank Street-ის შენობის ზედა 13 სართულზე უკვე გადავიდა, დანარჩენი კი სავარაუდოდ ოქტომბრის ბოლოს გადავა.
EBRD იუწყება, რომ Five Bank Street გაერთიანებულ სამეფოში ეკოლოგიური სტანდარტების თვალსაზრისით ერთ-ერთი ყველაზე მოწინავე საოფისე ნაგებობაა და არაერთი საერთაშორისო სერტიფიკატის მფლობელია. გარდა ამისა ბანკი შესაბამისი სერტიფიკატების მიღებას დიზაინის და კონსტრუქციის ნაწილშიც გეგმავს. საერთაშორისო ფინანსურ ინსტიტუტს პირობა აქვს დადებული, რომ 2025 წლისთვის მეტწილად მწვანე ბანკი გახდება, ხოლო წლის ბოლომდე ყველა აქტივობას პარიზის კლიმატის შეთანხმებასთან თანხვედრაში მოიყვანს .
ახალი შენობა გათვლილია ჰიბრიდული მუშაობის თანამედროვე მოდელზე, რომელიც კორონავირუსის გავრცელების პერიოდში განსაკუთრებით აქტუალური გახდა, შესაბამისად დასაქმებულებს ექნებათ შესაძლებლობა,რომ ვირტუალურ შეხვედრებში აქტიურად ჩაებნენ.
პროექტის დიზაინში ძირითად კონტრაქტორ, Overbury-სთან არაერთი ავტორიტეტული კომპანია იყო ჩართული, მათ შორის არიან BNP Paribas Real Estate, Perkins & Will, Turner & Townsend, AECOM და ა.შ.
ლონდონის ბირჟის მოედანზე არსებული შენობა, რომელშიც EBRD 1993 წლის შემდეგ იყო განთავსებული ბანკს ლიზინგით ჰქონდა აღებული და კონტრაქტის ვადა მიმდინარე წლის ბოლოს იწურება.
EBRD, ხელს უწყობს ღია ბაზრის ეკონომიკასა და კერძო სექტორს 36 ქვეყანაში სამ კონტინენტზე და თვითონ კი 71 ქვეყნის, ევროკავშირს და ევროპის საინვესტიციო ბანკის საკუთრებაა. EBRD - მა ადგილის ცვლილების შესახებ გეგმები 2019 წლის მაისში გააჟღერა.