ევროპის რეკონსტრუქციისა და განვითარების ბანკი (EBRD) საქართველოს ეროვნულ ბანკთან (NBG) და საერთაშორისო სავაჭრო პალატასთან (ICC) ერთად 2022 წლის 16 თებერვალს, თბილისში კონფერენციას „მწვანე დაფინანსება მდგრადი ეკონომიკისთვის" მასპინძლობს.
ღონისძიების მთავარი მიზანია დაინტერესებულ მხარეთა შორის ცნობიერების ამაღლება მდგრად დაფინანსებასა და მწვანე ტექნოლოგიების სავაჭრო ტრანზაქციებთან დაკავშირებით და ძირითადი რისკების, გამოწვევებისა და შესაძლებლობების განხილვა, რომლებიც კლიმატის ცვლილებამ შეიძლება წარმოშოს კერძო სექტორში და ზოგადად საბანკო სისტემაში.
შინამეურნეობების, ბიზნეს ოპერაციების და ენერგიის წყაროების განახლება ეკომეგობრული ტექნოლოგიებით, წარმოქმნის ბევრ ახალ საბანკო შესაძლებლობას. ის ასევე გააფართოებს მწვანე ფინანსების მოზიდვის გზებს საერთაშორისო კაპიტალის ბაზრებიდან.
„EBRD აქამდეც აქტიურად უჭერდა მხარს საქართველოს მწვანე მისწრაფებებს. გასულ წელს, საქართველოში, ჩვენი დაფინანსების 61% მწვანე ეკონომიკაზე გადასვლისკენ იყო მიმართული. ჩვენ ვახორციელებთ რამდენიმე ინიციატივას პოლიტიკის განვითარების მხრივ მწვანე პოლიტიკის დღის წესრიგის წინსვლისთვის. ვიმედოვნებ, რომ დღევანდელი ღონისძიება უფრო მეტად შეუწყობს ხელს საქართველოს ფინანსური სისტემის გამწვანებას“, - განაცხადა EBRD-ის რეგიონულმა დირექტორმა კავკასიაში კატარინა ბიორლინ ჰანსენმა.
მწვანე TFP (The Green TFP) საშუალებას აძლევს პარტნიორ ბანკებს გამოიყენონ არსებული სავაჭრო დაფინანსების საშუალებები ექსპორტის, იმპორტის და იმპორტირებული მწვანე ტექნოლოგიებისა და მასალების ადგილობრივი განაწილების დასაფინანსებლად EBRD-ის მწვანე ეკონომიკაზე გადასვლის (GET) მიდგომის შესაბამისად. TFP-ის მეშვეობით EBRD აძლევს გარანტიებს საერთაშორისო დამადასტურებელ ბანკებს და მოკლევადიან სესხებს შერჩეულ ბანკებსა და ფაქტორინგის კომპანიებს ადგილობრივი ექსპორტიორებისთვის, იმპორტიორებისთვის და დისტრიბუტორებისთვის სესხების გაცემის მიზნით. EBRD-ის სტრატეგიული მიზანია 2025 წლისთვის გახდეს დიდწილად მწვანე ბანკი.
ბანკის პროექტების საერთო რაოდენობამ საქართველოში მიაღწია 283-ს, საერთო ინვესტიციების მოცულობა დღეისათვის 5 მილიარდ ევრომდეა, ხოლო კერძო სექტორის ინვესტიციები 81 პროცენტს შეადგენს.