მნიშვნელოვანია, ავცრათ 60 წელს ზემოთ მოსახლეობის 90%-ზე მეტი, რაც იქნება ის გარდამტეხი მომენტი, რომელიც აისახება ლეტალობის მაჩვენებლის კლებაზე, - ამის შესახებ ჯანდაცვის მინისტრმა, ეკატერინე ტიკარაძემ ჟურნალისტებს განუცხადა.

მისი თქმით, მნიშვნელოვანია ვაქცინაციის ტემპის გაზრდა და არა დამნაშავის ძიება.

„ჯანდაცვის სამინისტრო ყოველთვის ითვალისწინებდა და ითვალისწინებს შესაბამისი სტრუქტურების რეკომენდაციებს, რომელიც შეეხება მკურნალობის, ტესტირების და მათ შორის ვაქცინაციის ნაწილს. ჩვენ მივყვებოდით ყველა იმ რეკომენდაციას, რომელიც ჩვენი საერთაშორისო და ადგილობრივი ექსპერტების მხრიდან იყო დადებული, თუმცა, მე არაერთხელ აღვნიშნე და ახლაც აღვნიშნავ, რომ მნიშვნელოვანია ფოკუსირება გავაკეთოთ 60 წელს ზემოთ მოსახლეობაზე, ვინაიდან ეროვნულ კალენდარშიც სწორედ ეს იყო გათვალისწინებული, რომ მნიშვნელოვანია ავცრათ 60 წელს ზემოთ მოსახლეობის 90%-ზე მეტი, რაც იქნება ის გარდამტეხი მომენტი, რომელიც აისახება ლეტალობის მაჩვენებლის კლებაზე, მიუხედავად იმისა, თუ რამდენი ინფიცირებული გვეყოლება“,-განაცხადა ტიკარაძემ.

კითხვაზე, ვინ არის პასუხისმგებელი იმაზე, რომ მოსახლეობის 60% ვერ აიცრა, ეკატერინე ტიკარაძემ უპასუხა, რომ ამასთან დაკავშირებით გაგრძელდება ექსპერტებთან ერთად მსჯელობა, რადგან საკითხი მეტ ჩაღრმავებას მოითხოვს.

„ამ ეტაპისთვის გაცილებით მნიშვნელოვანია, რომ შედეგი დაიდოს და არ ვეძიოთ დამნაშავე“, - განაცხადა ტიკარაძემ.

რაც შეეხება კოვიდგადატანილი პირებისთვის ე.წ მწვანე პასპორტის მუდმივობის საკითხს, ეკატერინე ტიკარაძე განმარტავს, რომ ამ საკითხზე საბჭოსთან ერთად ახალი მინისტრი იმსჯელებს.

„ის გაითვალისწინებს იმ რეკომენდაციებს, რომელსაც მისცემენ როგორც ადგილობრივი, ასევე საერთაშორისო ექსპერტები. დაველოდოთ საბჭოს გადაწყვეტილებას. იმ შემთხვევაში, თუ მე ჩართული ვიქნები, როგორც ექსპერტი, ექსპერტების ჯგუფთან ერთად ერთობლივად მივიღებ გადაწყვეტილებას და გავცემ რეკომენდაციას“,-განაცხადა ტიკარაძემ.

ipn.ge