პარლამენტის პლენარულ სხდომაზე საქართველოს 2021 წლის სახელმწიფო ბიუჯეტის შესრულების წლიური ანგარიში მოისმინეს. ინფორმაციას პარლამენტის პრესსამსახური ავრცელებს.
ფინანსთა მინისტრის პირველი მოადგილის, გიორგი კაკაურიძის ინფორმაციით, 2021 წელს ეკონომიკურმა ზრდამ 10,4% შეადგინა, რაც, მისივე შეფასებით, თავდაპირველად დაგეგმილ 4,3%-თან შედარებით მნიშვნელოვანი ზრდაა.
„ეკონომიკის აღდგენა, რაც 2020 წელს დაგვაკლდა, 2021 წელს მოხდა. დადებითმა ეკონომიკურმა ტენდენციებმა მოგვცა საშუალება მეტი შემოსავლები მიგვეღო. გაიზარდა ბიუჯეტის შემოსავლების ნაწილი და ჩვენ 2-ჯერ მოვახდინეთ ბიუჯეტში ცვლილებები - ივლისში და დეკემბერში“, - განაცხადა მომხსენებელმა.
მისი თქმით, საბოლოო ჯამში, ბიუჯეტი გიზარდა 1 400.0 ლარით. გიორგი კაკაურიძის თქმით, 25%-ით გაიზარდა საწარმოთა ბრუნვის მაჩვენებელი - გამოშვებული პროდუქციის ღირებულების მაჩვენებელი. გასულ წელთან შედარებით 51 000-ით მეტი სამუშაო ადგილი იყო ქვეყანაში. 2021 წლის ბოლოს ინფლაციის დონე 13.9% იყო. 2021 წელს საქართველოში საქონლით საგარეო სავაჭრო ბრუნვამ 14 326.7 მლნ აშშ დოლარი შეადგინა, რაც წინა წლის შესაბამის მაჩვენებელზე 25.7 %-ით მეტია. აქედან ექსპორტი 4 242.3 მლნ აშშ დოლარს შეადგენს, ხოლო იმპორტი - 10 084.4 მლნ აშშ დოლარს.
„საანგარიშო პერიოდში მთლიან საქონელბრუნვაში ევროკავშირის წილმა 21.1 %-ს შეადგინა; თურქეთის - 15.0 %; რუსეთის - 11.4 %“, - განაცხადა გიორგი კაკაურიძემ.
მომხსენებლის ინფორმაციით, 2021 წელს წმინდა ფულადი გზავნილები წინა წელთან შედარებით 24 %-ით გაიზარდა და 2 032.7 მლნ აშშ დოლარი შეადგინა. საქართველოში განხორციელებული პირდაპირი უცხოური ინვესტიციების მოცულობა გაიზარდა 101.6 პროცენტით და შეადგინა 1 152.8 მლნ აშშ დოლარი. რაც შეეხება ნაერთი ბიუჯეტის პარამეტრებს, მომხსენებლის ინფორმაციით, დაგეგმილი იყო 14 928 250.0 ათასი ლარის მობილიზება, ფაქტობრივად კი, მობილიზებული იქნა 15 142 672.8 ათასი ლარი. რაც შეეხება გადასახადების საპროგნოზო მაჩვენებელს, განსაზღვრული იყო 13 271 250.0 ათასი ლარი, ხოლო მობილიზებულ იქნა 13 379 960.6 ათასი ლარი. გრანტების საპროგნოზო მაჩვენებელი განისაზღვრა 457 000.0 ათასი ლარით, საანგარიშო პერიოდში მობილიზებულ იქნა 494 447.1 ათასი ლარი. სხვა შემოსავლებიდან მიღებულია 1 268 265.1 ათასი ლარი, ანუ საპროგნოზო მაჩვენებლის 105.7%.
გიორგი კაკაურიძის ინფორმაციით, სახელმწიფო ბიუჯეტის შემოსავლების კუთხით, მიღებულია 12 750 272.7 ათასი ლარი; გადასახადებში მობილიზებული იქნა 11 439 488.6 ათასი ლარი; გრანტებში 487 106.9 ათასი ლარი; სხვა შემოსავლების სახით კი მიღებულია 823 677.1 ათასი ლარი.
საფინანსო-საბიუჯეტო კომიტეტის თავმჯდომარის, ირაკლი კოვზანაძის შეფასებით, 2021 წელი 2020 წელთან შედარებით, ფისკალური თვალსაზრისით, უკეთესი იყო.
„ფისკალური თვალსაზრისით, 2021 წელი 2020 წელთან შედარებით უკეთესი იყო. შარშან წლის განმავლობაში 2021 წლის სახელმწიფო ბიუჯეტში ცვლილებები ორჯერ განხორციელდა. ჯამში ბიუჯეტის ასიგნებები, რომელიც თავდაპირველად იყო 18 მილიარდ 385 მილიონი ლარი, გაიზარდა მილიარდ 411 მილიონი ლარით და 19 მილიარდ 796 მილიონი ლარი შეადგინა“, - ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ საპარლამენტო სესიაზე სიტყვით გამოსვლისას განაცხადა, სადაც 2021 წლის სახელმწიფო ბიუჯეტის შესრულების ანგარიში განიხილეს.
ირაკლი კოვზანაძის თქმით, ამ ცვლილებებით, 2021 წელს ჯანდაცვის, სოციალური დაცვის და დევნილთა ასიგნებები ჯამურად გაიზარდა - 976 მლნ. ლარით, ასიგნებები სოფლის მეურნეობის მხარდაჭერის და გარემოს დაცვის მიმართულებით - 177 მლნ. ლარით, თავდაცვის ხარჯები - 90 მლნ. ლარით, პროგრამა განახლებული რეგიონები - 90 მლნ. ლარით, განათლების ხარჯები - 40 მლნ. ლარით. კულტურა, სპორტი და ახალგაზრდობის მიმართულება - 31 მლნ. ლარით და ა.შ.
„2021 წელს სახელმწიფო ბიუჯეტის შესრულების შუალედური ანგარიშები, რეგლამენტის შესაბამისად, განვიხილეთ საფინანსო-საბიუჯეტო კომიტეტზე“, - აღნიშნა ირაკლი კოვზანაძემ. თანამომხსენებელმა დეტალურად ისაუბრა გასული წლის ბიუჯეტის მთავარ პარამეტრებზე, მიღწევებზე და გამოწვევებზე.
„ინფლაცია შარშან და წელსაც არის მთავარი გამოწვევა ჩვენი ეკონომიკის და საზოგადოების. ცხადია ეს ეროვნული ბანკის პასუხისმგებლობა და მანდატია, მაგრამ მნიშვნელოვანია, ფინანსთა სამინისტროს ჩართულობა, რათა ინფლაციის მაჩვენებელი მაქსიმალურად სწრაფად დაუახლოვდეს მიზნობრივ დონეს, ფასები რეალურად შემცირდეს და მოსახლეობის სოციალური მდგომარეობა გაუმჯობესდეს“, - აღნიშნა ირაკლი კოვზანაძემ.