საქართველოს ეკონომიკისა და მდგრადი განვითარების სამინისტროს ახალი ხელმძღვანელი ჰყავს.  ამ თანამდებობაზე 3 წლიანი მუშაობის შემდეგ ნათია თურნავას გარემოს დაცვისა და სოფლის მეურნეობის უკვე ყოფილი მინისტრი ლევან დავითაშვილი ანაცვლებს. ამის შესახებ გადაწყვეტილება საქართველოს პრემიერ-მინისტრმა ირაკლი ღარიბაშვილმა ოთხშაბათს, 9 თებერვალს მიიღო.

ვინ არის ლევან დავითაშვილი

ლევან დავითაშვილი გარემოს დაცვისა და სოფლის მეურნეობის მინისტრის თანამდებობას 2016 წლის 9 სექტემბრიდან იკავებს. 

2021 წლიდან დღემდე ის ვიცე - პრემიერის  მოვალეობას ასრულებს.

2014 - 2016 წლებში დავითაშვილი საქართველოს სოფლის მეურნეობის მინისტრის მოადგილე იყო.

2012 - 2014 წლებში ის საქართველოს ღვინის ეროვნული სააგენტოს ხელმძღვანელობდა.

2010-2011 წლებში საქართველოს ღვინის მწარმოებელთა კავშირის გამგეობის თავმჯდომარე იყო.

მანამდე 2010-2011 წლებში კი ამავე კავშირის გამგეობის წევრი იყო

2009 - 2012 წლებში  დავითაშვილს შპს ,,SCHUCHMANN WINES GEORGIA” - ს გაყიდვებისა და მარკეტინგის დირექტორის თანამდებობა ეკავა.

2007-2009 წლებში  ის USAID - ის სოფლის მეურნეობის განვითარების პროექტის Ag Vantage - ის მარკეტინგის დეპარტამენტს ხელმძღვანელობდა.

2002-2007 წლებში შპს ,,წინანდლის ძველი მარნის“ გენერალური მენეჯერი თანამდებობაზე მუშაობდა.

1999-2001 წლებში მსოფლიო ბანკის საწარმოთა რესტრუქტურიზაციისა და მართვის დახმარების ცენტრის მთავარი ბიზნეს - კონსულტანტი იყო.

1999 – 1999 წლებში საქართველოს ფინანსთა სამინისტროს შემოსავლების სამსახურის სოციალური გადასახადების დეპარტამენტის უფროსი იყო

1997 – 1999 წლებში კი საქართველოს დაზღვევის სახელმწიფო ზედამხედველობის სამსახურის სადაზღვევო რეგულაციებისა და სტანდარტების დეპარტამენტის უფროსი იყო.

განათლებით ლევან დავითაშვილი  ეკონომისტია და ბაკალავრიატი თბილისის სახელმწიფო უნივერსიტეტში დაამთავრა.  ამავე უნივერსიტეტში საერთაშორისო ბიზნესის მართვის მაგისტრის ხარისხი მიიღო. ეკონომიკის ახლად დანიშნულ მინისტრს მილანის ბიზნესის მართვის  მაგისტრის ხარისხიც აქვს.