ეკონომიკის მხარდამჭერ ღონისძიებებს შორის სოფლის მეურნეობა და სამშენებლო სფერო, ერთ-ერთი მთავარია, რომლის განვითარებაზეც საქართველოს მთავრობა ყველაზე მეტად ზრუნავს. გარდა იმისა, რომ ამ სფეროებში ყველაზე მეტი ადამიანია დასაქმებული, მშპ-ზე გავლენითაც იქცევენ ყურადღებას. როგორც სტატისტიკოსი სოსო არჩვაძე ,,კომერსანტთან“ განმარტავს, ეს დარგები მაღალი მულტიპლიკატორული ეფექტით გამოირჩევიან და თუ მეტი ბიძგი ექნებათ სახელმწიფოს მხრიდან, ამან შეიძლება მთელი ეკონომიკის ლოკომოტივი უფრო დაჩქარებულად წაიყვანოს წინ.
მიიღე ინფორმაცია უფრო სწრაფად „კომერსანტის“ Telegram-ზე.
,,ყურადღება გადატანილია იმ დარგებზე, რომლებიც შექმნილ სიტუაციაში ყველაზე მეტად საჭიროებს დახმარებას. სოფლის მეურნეობასა და მშენებლობისადმი აქცენტის გაკეთება განპირობებულია რამდენიმე ფაქტორით: აგრარული სექტორი არის სანედლეულო ბაზა ეკონომიკის რამდენიმე დარგისთვის. როგორც მშენებლობა, ისიც მაღალი მულტიპლიკატორული ეფექტით გამოირჩევა. რაც შეეხება მშენებლობას, ეს მიმართულება რომ განვავითაროთ, თავისთავად სამშენებლო ინდუსტრიის, მრეწველობის, ტრანსპორტის განვითარებას, სამშენებლო მასალების წარმოების ზრდას გამოიწვევს, რაც საბოლოო ჯამში, ქმნის დამატებით სამუშაო ძალას ქვეყანაში. შესაბამისად, თუ მეტი ბიძგი ექნებათ სახელმწიფოს მხრიდან, ამან შეიძლება მთელი ეკონომიკის განვითარების პროცესი დააჩქაროს“, - აცხადებს არჩვაძე.
რაც შეეხება აღნიშნულ დარგებში დასაქმების მაჩვენებელს, როგორც სტატისტიკოსი განმარტავს, სოფლის მეურნეობაში 246 300 ადამიანია დასაქმებული, რაც დასაქმებულთა მთლიანი რიცხვის 19,8%-ს შეადგენს და თითქმის 1/5-ია, ხოლო მშენებლობაში დასაქმებულთა რაოდენობა 85 200 ადამიანია, საერთო რაოდენობის 6,9%. თუმცა ორივე დარგი ეკონომიკაში შეტანილი წვლილის მიხედვით განსხვავდებიან.
შედარებისთვის, ეკონომიკაში შეტანილი წვლილის მიხედვით, სოფელზე მოდის მხოლოდ 7%, ხოლო მშენებლობაზე - 8%-ზე ცოტა მეტი. მიუხედავად იმისა, რომ ამ სფეროში 2,5-ჯერ ნაკლები დასაქმებულია, ვიდრე სოფლის მეურნეობაში, ეკონომიკაში მეტ დოვლათს ქმნის. 1 დასაქმებულზე მშენებლობაში 3,3-ჯერ მაღალია შრომის მწარმოებლურობა, ვიდრე სოფლის მეურნეობაში.
ძველი მეთოდოლოგიის შემთხვევაში ადგილი აქვს 9-ჯერად ჩამორჩენას სოფლის მეურნეობაში ეროვნული მეურნეობის საშუალო დონესთან შედარებით.
მარი ჩიტაია