„ეს შეკითხვა აღმასრულებელთან. მე მხოლოდ შემიძლია დავინტერესდე და ასეც გავაკეთებ. თუმცა არ მაქვს ინფორმაცია. დავაზუსტებ და ორ სამ დღეში შემეხმიანეთ,“ - ასეთი იყო პარლამენტის ეკონომიკური კომიტეტის თავმჯდომარის, რომან კაკულიას პასუხი „კომერსანტის“ კითხვაზე, აქვს თუ არა ინფორმაცია, რომ საქართველოში კონტრაბანდული სიგარეტი მასობრივად და შეუფერხებლად იყიდება.
თუ „ქართული ოცნების“ რომელიმე წევრს მინიმუმ სოციალურ ქსელთან წვდომა აქვს, შეუძლებელია არ ენახათ ფოტოფაქტები იმის შესახებ, თუ როგორ უპრობლემოდ იყიდება აფხაზეთიდან შემოსული კონტრაბანდული სიგარეტი სამეგრელოსა და აჭარის რეგიონში.
ეკონომიკური კომიტეტის თავმჯდომარე რომან კაკულია კი ან მართლაც საქმის კურსში არ არის რა ხდება საქართველოს ეკონომიკაში, ან ადასტურებს, რომ კონტრაბანდული სიგარეტით ვაჭრობა მმართველი გუნდის ეკონომიკური პოლიტიკის ნაწილი გახდა.
საფინანსო კომიტეტის თავმჯდომარე ირაკლი კოვზანაძე კი „კომერსანტის“ ზარებსა და შეტყობინებებს არ პასუხობს.
კონტრაბანდული “მანჩესტერი“ ბათუმის ქუჩებში და სამეგრელოს რეგიონში დახლებს მიღმა აფხაზური აქციზური მარკით ძალიან იაფად იყიდება. აღნიშნული პრობლემა რამდენიმე წელია აქტიურად შეუქდება მედიაში. მიუხედავად მებაჟე-ოფიცრების მიერ აღმოჩენილი არაერთი შემთხვევისა, რამდენიმე დღის წინ სოციალურ ქსელში ერთ-ერთმა მომხმარებელმა მის მიერ, აჭარაში შეძენილი სიგარეტის კოლოფის ფოტო გამოაქვეყნა.
სს კოდექსის მე-200 მუხლის თანახმად, ქმედება დასჯადია, როდესაც უაქციზო საქონლის ღირებულება აღემატება 2 000 ლარს, ხოლო თუ მისი ღირებულება 2000 ლარზე ნაკლებია, ამ შემთხვევაში ადგილი აქვს ადმინისტრაციულ სამართალდარღვევას, რაზედაც რეაგირებას ახორციელებს შემოსავლების სამსახურის შესაბამისი დანაყოფი.