ბიზნესს ინფლაციის გაუარესების მოლოდინი აქვს. როგორც სებ-ის პუბლიკაციაში „ინფლაციური მოლოდინები და ეკონომიკური აქტივობა“ არის აღნიშნული, ეკონომიკური საქმიანობის მონაწილეთა მიხედვით, დეკემბერთან შედარებით ინფლაციური მოლოდინები გაზრდილია.

კერძოდ, მომატებულია იმ რესპოდენტთა რაოდენობა, რომლებიც მომდევნო 1 წლის მანძილზე ფასების ზრდას 8%-ზე მეტად ფიქრობს. ამავდროულად, იანვრის თვეში შემცირებულია იმ მონაწილეთა რაოდენობა, რომლებმაც 1 წლის შემდგომ ფასების ზრდა 4%-6%-თან ახლოს დააფიქსირეს.

მოცემულ ანგარიშში წარმოდგენილია ინფლაციური მოლოდინებისა და ეკონომიკური აქტივობის შესახებ ეკონომიკური საქმიანობის მონაწილეთა გამოკითხვის იანვრის თვის შედეგები.

ამავე გამოკითხვის მიხედვით, იანვარში დეკემბერთან შედარებით სამწლიან პერიოდზე ინფლაციური მოლოდინები მცირედით გაზრდილია. კერძოდ, დეკემბერთან შედარებით, გაზრდილია იმ მონაწილეთა რაოდენობა, რომლებიც ფასების ზრდას 6%-8%-იან და 4%-6%-იან ინტერვალებში ელოდებიან. ამის საპირისპიროდ, შემცირებულია იმ მონაწილეთა რაოდენობა, რომლებიც საშუალოდ მომდევნო სამი წლის მანძილზე ფასების 0%-2%-სა და 2%-4%-ის ფარგლებსა და 8%-ზე მეტად ზრდას ფიქრობენ.

გამოკითხულთა აზრით, საკუთარ პროდუქციაზე/მომსახურებაზე ფასების ცვლილების მოლოდინი 1 წლიან პერიოდში გაზრდილია. კერძოდ, დეკემბერთან შედარებით მომატებულია იმ რესპოდენტთა რაოდენობა, რომლებიც ფასების მატებას 6%-8%-იან ინტერვალსა და 8%-ზე მეტად მოიაზრებენ. მეორე მხრივ, დაიკლო იმ რესპოდენტთა რაოდენობამ, რომლებიც ფასების ცვლილებას 0%-2%-თან ახლოს ინტერვალში ფიქრობენ.

ამავე გამოკითხვის მიხედვით, დეკემბერთან შედარებით მოლოდინები ხელფასების ცვლილებაზე გაზრდილია. გამოკითხულთა უმრავლესობა ხელფასების მატებას 0%-10%-ების ფარგლებში ფიქრობენ, მეორე მხრივ, გაზრდილია იმ რესპოდენტთა რაოდენობა, რომლებიც ხელფასების მატებას 30%-ზე მეტად ვარაუდობენ. ამავდროულად გამოჩნდნენ ისეთი რესპოდენტები, რომლებიც ხელფასების კლებას (10%-ზე მეტად) პროგნოზირებენ.

გამოკითხულთა აზრით, კომპანიაში წარმოებისათვის საჭირო რესურსების ათვისების დონე (კომპანიის რესურსების რეალური გამოყენება, მაქსიმალურ გამოყენებასთან შედარებით) იანვარში დეკემბერთან შედარებით შემცირებულია.