ეკონომიკური თავისუფლების ინდექსის მიხედვით, საქართველო 71.8 ქულით, მსოფლიოში 26-ე ადგილს იკავებს, ხოლო ევროპის რეგიონის 45 ქვეყანას შორის მე-18 ადგილზეა და მისი საერთო ქულა რეგიონულ და მსოფლიო საშუალო მაჩვენებელს აღემატება.
საქართველოს ეს მაჩვენებელი 14 პოზიციით გაუარესდა და როგორც The Heritage Foundation აფასებს, ბოლო ხუთი წლის განმავლობაში, საქართველოს ეკონომიკური ზრდა 2019 წლისთვის ძლიერი იყო, 2020 წელი უარყოფითი აღმოჩნდა, ხოლო 2021 წელს ნაწილობრივ აღდგა.
ბოლო ნახევარი ათწლეულის განმავლობაში საქართველოს ეკონომიკური თავისუფლების გაფართოების შესაშური გამოცდილება შეჩერდა. სუსტი ფისკალური სიჯანსაღისა და ბიზნესის თავისუფლების შემცირების გამო, საქართველოში 2017 წლიდან ეკონომიკური თავისუფლების საერთო კლებამ 4.2 პუნქტი შეადგინა და გადაინაცვლა ძირითადად თავისუფალი კატეგორიის ქვედა ნახევარში, - ნათქვამია კვლევაში.
„ამასთან, ვაჭრობის თავისუფლებისა და საგადასახადო ტვირთის ქულები რჩება მყარი, ასევე სასამართლო ეფექტურობა და შრომის თავისუფლება საჭიროებს გაუმჯობესებას“, – წერს, The Heritage Foundation.
ეკონომიკური თავისუფლების ინდექსში საქართველოს დაქვეითება მნიშვნელოვან პრობლემად მიაჩნია პოლიტიკოს ზურაბ გირჩი ჯაფარიძეს. მისი თქმით, ამ მონაცემის გაუარესება ნეგატიურად აისახება ქვეყნის საინვესტიციო გარემოზე.
„ეკონომიკური თავისუფლება ივესტიციების მოზიდვის ერთადერთი საშუალებაა. განსაკუთრებით მაშინ, როცა ქვეყნის ტერიტორიის 20% ოკუპირებულია და მძიმე გეოპოლიტიკურ მდგომარეობაში ვიმყოფებით. ჩვენი ქვეყნის ერთადერთი ზრდის საშუალება კი სწორედ ინვესტიციებია. მათ გარეშე საქართველოში არ შეიქმნება სამუშაო ადგილები, არ გაიზრდება ხელფასები, დავრჩებით ასეთივე ღარიბებად და სრულად მოკვდება განვითარების პერსპექტივა“, – წერს ჯაფარიძე სოციალურ ქსელში.