საქართველოს ეკონომიკა 2022 წელს 7%-ით გაიზრდება, ასეთია აზიის განვითარების ბანკის განახლებული პროგნოზი. აღნიშნულს კი ADB-ში გაზრდილი ექსპორტისა და ტურიზმის, ფულადი გადარიცხვებისა და ძლიერი კერძო მოხმარებით ხსნიან. საქართველოს მთლიანი შიდა პროდუქტის (მშპ) ზრდა 2023 წელს კი 6%-ით არის მოსალოდნელი. მიმდინარე წლის აპრილში ADB 2022 წელს 3.5%-იან, ხოლო 2023 წელს 5%-იან ზრდას ელოდა, მიუხედავად რუსეთის უკრაინაში შეჭრის გამო გაზრდილი რისკებისა. აზიის განვითარების ბანკის პროგნოზი ერთ-ერთი ყველაზე ოპტიმისტურია ქართული და საერთაშორისო ორგანიზაციების პროგნოზებს შორის.
საქართველოს მთავრობამ 2022 წლის ეკონომიკური ზრდის პროგნოზი თავდაპირველი 6.0%-დან 8.5%-მდე გაზარდა, ხოლო ეროვნული ბანკი წელს ქვეყნის ეკონომიკის 9%-ით გაზრდას პროგნოზირებს. ეროვნული ბანკის პრეზიდენტი, კობა გვენეტაძე მოელის, რომ აშშ-ის ფედერალური სარეზერვო სისტემისა და ევროპის ცენტრალური ბანკის მიერ საპროცენტო განაკვეთების ზრდას საქართველოში უცხოური ვალუტით დაკრედიტებაზე მონეტარული პოლიტიკის გამკაცრების მსგავსი ეფექტი ექნება.
რაც შეეხება საერთაშორისო ორგანიზაციებს. საერთაშორისო სარეიტინგო სააგენტო S&P Global-მა საქართველოს ეკონომიკური ზრდის პროგნოზი 4%-დან 8%-მდე გაზარდა. სააგენტოს თანახმად, ზრდის მიზეზი ომის შედეგად ქვეყანაში მიგრანტების შემოდინებაა, რაც ტურიზმის აღდგენას უზრუნველყოფს. 2023 და 2024 წლების პროგნოზი, შესაბამისად, 3% და 4.5%-ია. რაც შეეხება სხვა საერთაშორისო ორგანიზაციებს, მსოფლიო ბანკის განახლებული პროგნოზით, წელს ქვეყნის ეკონომიკა 5.5%-ით გაიზრდება. ახალი მაჩვენებელი აპრილში გამოქვეყნებულ პროგნოზთან შედარებით 3%-ით მეტია, იანვარში გამოქვეყნებულ ანგარიშთან შედარებით კი უცვლელია - მსოფლიო ბანკი იანვარში საქართველოს ეკონომიკის 5.5%-იან ზრდას პროგნოზირებდა, აპრილში კი საპროგნოზო მაჩვენებელი 2.5%-მდე შეამცირა. მომდევნო წლების, 2023 და 2024 წლების პროგნოზი, 5.5% და 5%-ია.
2022 წელს თიბისი კაპიტალი მოელის, რომ საქართველოს ეკონომიკა წლიურად 10.6%-ით გაიზრდება. ორგანიზაციის საბაზისო პროგნოზით, ექსპორტის წლიური ზრდა 28% იქნება, ტურიზმის მაჩვენებელი პანდემიამდელ, 2019 წლის მაჩვენებლებს 5%-ით გადააჭარბებს, პირდაპირი უცხოური ინვესტიციები 35%-ით გაიზრდება, ხოლო ფულადი გზავნილები წლიურად 23%-ით გაიზრდება. თიბისი კაპიტალის მთავარი ეკონომისტი ოთარ ნადარაია ამბობს, რომ 2022 წელს მთლიანი შიდა პროდუქტის რეალური ზრდა ძირითადად ტურიზმის ხარჯზე ექნება.
„ჩვენი საბოლოო სცენარით მთლიანი შიდა პროდუქტის ზრდა 10%-ს გადააჭარბებს. გარდა ამისა, ჩვენი პროგნოზით, წლის პირველ ნახევართან შედარებით, მეორე ნახევარში ეკონომიკის ზრდა უფრო მაღალი იქნება. წლიურ ჭრილში თუ განვიხილავთ ძირითადი ტურიზმის სექტორია, რადგან ის ჩვენი ეკონომიკის ყველაზე მსხვილი ინდუსტრიაა. უკვე ივლისში სავალუტო შემოდინებები 120%-ით გაიზარდა 2019 წელთან შედარებით. წლიურად ეს აღდგენა გაცილებით დიდია, რადგან 2021 წელი მნიშვნელოვანი აღდგენის პერიოდი არ იყო.
ეკონომიკურ ზრდაში ექსპორტის მაჩვენებელი და ფულადი გზავნილები ძლიერი ფაქტორია. ძირითადად ტურიზმი, ექსპორტი, გზავნილები, ზომიერი საბანკო დაკრედიტება უზრუნველყოფს ამ ეკონომიკურ ზრდას”, - ამბობს ოთარ ნადარაია.
ეკონომისტი აკაკი ცომაია „კომერსანტთან“ ამბობს, რომ სარეიტინგო კომპანიების პროგნოზი ხშირ შემთხვევაში რეალობისგან განსხვავდება და უფრო ოპტიმისტურია.
„დღევანდელ დღეს პროგნოზების გაკეთება რთულია, რადგან გაურკვევლობის ფაქტორი ძალიან მაღალია და რთულია იმაზე საუბარი თუ რამდენით გაიზრდება ქვეყნის მშპ. ჩვენი ეკონომიკური ზრდის ტრენდი მნიშვნელოვნად დამოკიდებული არის რუსეთის ფაქტორზე, რადგან მოთხოვნა ძირითადად ხდება რუსეთის მოქალაქეებისგან, ამიტომ ჩვენ არ ვიცით მაგალითად რამდენი აქვთ მათ დარჩენილი შემოსავალი, როგორ წავა რუსეთში მდგომარეობა, ამდენად რაიმეს პროგნოზირება რთულია, ასევეა სარეიტინგო კომპანიების შემთხვევაშიც. როდესაც ასეთი ორგანიზაციები აქვეყნებენ პროგნოზებს, ისინი ძირითადად ოპტიმისტურია და 1%-1.5%-შია ხოლმე ცდომილება“, — ამბობს აკაკი ცომაია.
საქართველოს სტატისტიკის ეროვნული სამსახურის მონაცემებით, 2022 წლის პირველ 7 თვეში ქვეყნის ეკონომიკის ზრდის საშუალო მაჩვენებელი 10.3%-ია, უშუალოდ ივლისში ზრდის მაჩვენებელი კი 9.7%-ს შეადგენს.