რუსეთ-უკრაინის ომისა და გლობალურ ეკონომიკაში შექმნილი პროცესების გამო,  საქართველოს მთავრობის მიერ დაგეგმილი ეკონომიკური ზრდა სავარაუდოდ 2,5 პროცენტული პუნქტით შემცირდება. მოსალოდნელ დანაკარგს ადასტურებენ მთავრობაში, ამ მოსაზრებას ექსპერტულ წრეშიც იზიარებენ. სტატისტიკოსი სოსო არჩვაძე ფიქრობს, რომ ომმა მრავალი ქვეყნის ეკონომიკის ზრდა შეანელა, რის პარალელურადაც იზრდება ინფლაცია და ეს პროცესი თანმდევია საქართველოსთვის, სადაც ომმა არასახარბიელო მოცემულობა შექმნა.

მიიღე ინფორმაცია უფრო სწრაფად „კომერსანტის“  Telegram-ზე.

,,ომი უკრაინაში ნეგატიურად მოქმედებს გლობალურ პროცესებზე, მათ შორის, მიწოდების ნაკადებზე, ფასწარმოქმნის სისტემაზე და ეკონომიკური ზრდის პერსპექტივაზე. მინისტრთა კაბინეტის ეკონომიკური ბლოკის წარმომადგენლებმა უკვე შეაფასეს ვითარება.  წინასწარი მასშტაბით, ეს არის ეკონომიკური ზრდისთვის მტკივნეული მაჩვენებელი - 2,5 პროცენტული პუნქტით ნაკლები შეიძლება იყოს სავარაუდო ზრდასთან, მაგრამ ეს პირობითი რიცხვია. საბოლოოდ მდგომარეობა დამოკიდებულია იმაზე, რამდენ ხანს გასტანს კრიზისი და რამდენად ექნება მულტიპლიკატორული ეფექტი მსოფლიოს დანარჩენ ეკონომიკაზე. წინასწარ რამის თქმა პირობითია, თუმცა დანამდვილებით შეგვიძლია განვაცხადოთ, რომ  კლება მკვეთრი იქნება“, - ამბობს არჩვაძე ,,კომერსანტთან“.

მისი თქმით, მოსალოდნელია ინფლაციის ზრდაც, რაც   ასევე მკვეთრად გამოხატული გლობალური პროცესების გავლენაა.

,,ინფლაციაზე ნეგატიურად მოქმედებს ორი ფაქტორი:  ერთია ხარჯების ზრდა და მიწოდების (ტრანსპორტირების) ღირებულების მატება. ნებისმიერი წარმოების ფასი იზრდება საწვავის გაძვირების გამო.  კატასტროფულად მოიმატა ლოგისტიკის ხარჯმაც. როგორც ვხედავთ, დიდწილად კონტეინერების გაძვირებისა და  რისკების გაზრდის გამო იზრდება ფასები და ინფლაციაზეც ადეკვატურად აისახება“, - დასძენს არჩვაძე.

შეგახსენებთ, რომ 2021 წელს საქართველოში რეალურმა ეკონომიკურმა ზრდამ 10,6%-ს მიაღწია, რაც თავდაპირველად პროგნოზირებულ მაჩვენებელზე 2,5-ჯერ მეტია. იანვარში ზრდა 18% იყო, ხოლო თებერვალში წინა თვესთან შედარებით ინფლაციის დონემ 0.9%, ხოლო წლიური ინფლაციის დონემ 13.7% შეადგინა.

უკვე 9 თვეა საქართველოში ორნიშნა ინფლაცია ფიქსირდება.

ეროვნული ბანკის გათვლით, აპრილიდან ინფლაციის კლება უნდა დაწყებულიყო, თუმცა უკვე გამოჩნდა, რომ ომისა და ფასების ზრდის ფონზე ინფლაციის მოთოკვა დიდი პრობლემა და სიძნელე იქნება საქართველოსთვის.

მარი ჩიტაია