ქართველები ხაჭაპურს მთელი ქვეყნის მასშტაბით ამზადებენ. ეს ყველიანი პური იმდენად პოპულარულია, რომ თბილისის სახელმწიფო უნივერსიტეტის ეკონომისტები მას ინფლაციისა და ქალაქებს შორის ცხოვრების ღირებულების მაჩვენებლის დასათვლელად იყენებენ.- ამ ინფორმაციას, გამოცემა atlasobscura აქვეყნებს. გამოცემა წერს, რომ ეკონომისტები შინამეურნეობის საშუალო შემოსავალს ყოფენ X ინდექსზე (ინგრედიენტების ღირებულება, ენერგომატარებლების ღირებულება, მაგალითად გაზი ან ელექტროენერგია) ეს ინდექსი გვაჩვენებს თუ რა ზომის ხაჭაპურის გამოცხობა შეუძლია ერთ საშუალო ოჯახს თითოეულ ქალაქში.
გამოცემა წერს, რომ ხაჭაპური მთელ საქართველოში ფართოდ არის გავრცელებული, თუმცა ამის მიუხედავად მისი დეტალები რეგიონების მიხედვით განსხვავდება. მას შეიძლება ჰქონდეს ორმაგი ქერქი, იყოს მრგვალი ან კვადრატული, სხვადასხვა რეგიონში ვხვდებით ყველით სავსეს ან ნაკლებ ყველიანს. გამოცემა ასევე აღნიშნავს, რომ ქართველები ხაჭაპურის გამოცხობის დროს ყველის და ცომის ფართო ასორტიმენტს იყენებენ, ასევე მისი მომზადება შეიძლება როგორც გაზქურაზე ასევე ღუმელში. Atlas ასევე წერს, რომ ზოგიერთ რეგიონში ხაჭაპური შეიძლება შეიცავდეს მწვანილს ან მოხარშულ კარტოფილს, ზოგიერთი მათგანი კი სავსეა კვერცხებით.
Atlas აჭარულ ხაჭაპურზეც წერს და აღნიშნავს, რომ აჭარული ხაჭაპური შავი ზღვის რეგიონიდან მოდის და მას ღია ნავის ფორმა აქვს, შიგთავსში კი უმ კვერცხს და კარაქს ვხვდებით.
გამოცემა ასევე აღნიშნავს, რომ აჭარლები პურის ნავებს სულგუნით ავსებენ და მას ცოტა მომჟავო და მარილიან ყველს, ზოგ შემთხვევაში კი მოცარელას უმატებენ.