კომპანია „ეკოვუდმა“, რომელიც საქართველოში ნატურალური ხის მასალებისა და ხის დასამუშავებელი ლაქ-საღებავების ერთ-ერთმა უმსხვილესი იმპორტიორია, „აწარმოე საქართველოს“ და USAID-ის თანადაფინანსებით და მხარდაჭერით, ნატახტარში რეგიონული ჰაბი შექმნა, სადაც წარმოებაც განთავსდა და იქვე მოხდება პროდუქციის შექმნა და გადამუშავება.
„ეკოვუდის“ ასორტიმენტი საკმაოდ მრავალფეროვანია. გაყიდვაშია ფასადის მოსაპირკეთებელი მასალები, იატაკისა და კედლის პანელები, სამზარეულოს ზედაპირები, ავეჯის დასამზადებელი მასალა, ოთახებს შორის გამყოფი ტიხრები და ა.შ. მათ დასამზადებლად გამოყენებულია სხვადასხვა სახეობის ხის მასალა, მათ შორის ნაძვი, ფიჭვი, ლარიქსი და სხვადასხვა ტროპიკული ხეები.
კომპანია უკრაინაში მიმდინარე ომის გამო რთული გამოწვევების წინაშე აღმოჩნდა, როგორც ლოგისტიკური, ისე პროდუქციის ხელმისაწვდომობისა და ფასთა პოლიტიკის კუთხით, მაგრამ როგორც „ეკოვუდის“ კორპორაციული გაყიდვების და მარკეტინგის ხელმძღვანელმა გიორგი სრესელმა რადიო „კომერსანტის“ ეთერში განაცხადა, კომპანიამ დივერსიფიკაცია შეძლო და ალტერნატიული ბაზრები მოიძია.
„ალტერნატიული ბაზრები მოვიძიეთ და სხვადასხვა მომწოდებლებთან დავამყარეთ კოტაქტები. პირველი მიწოდება განხორციელდა ამერიკასთან და კანადასთან, ასევე ბრაზილიასთან, ამაზონის ტყის მასივებიდან მოხდა სხვადასხვა უნიკალური ტყის სახეობების შემოტანა. მანამდე მომხმარებელს ვთავაზობდით ტროპიკული ხის სახეობის სხვადასხვა პოზიციებს აფრიკის ქვეყნებიდან, მალაიზიიდან, ინდონეზიიდან“, - აცხადებს გიორგი სრესელი.
რაც შეეხება ფასებს, გიორგი სრესელი ამბობს, რომ მდგომარეობა შედარებით დასტაბილურდა და ფასებიც საკმაოდ კონკურენტუნარიანი აქვთ.
„ფასების განუყრელი ნაწილია ლოგისტიკური ხარჯები. ახლა პანიკის ფონი აღარაა. პროდუქციის მიწოდების ჯაჭვიც აღდგენილია და ფასებზეც ეს უკვე ასახულია. მე ვფიქრობ, რომ ის არასტაბილური პერიოდი, კომპანიამ აიღო თავის თავზე და ფასებზეც არ ასახულა. ვცდილობდით და ვიმედოვნებდით, რომ დასტაბილურება მალე იქნებოდა და თუ შევადარებთ მეზობელი ქვეყნების ფასებს, ვფიქრობ, საკმაოდ კონკურენტუნარიანი ფასები გვაქვს,“- აცხადებს გიორგი სრესელი.
გიორგი სრესელის თქმით, „ეკოვუდის“ მთავარი უპირატესობა ეკოლოგიურად სუფთა პროდუქციაა და ხის მიმართ ინტერესი მზარდია.
„თუ ადამიანი ეკოლოგიურად სუფთა სივრცის შექმნას ფიქრობს, „ეკოვუდში“ ვიზიტით უნდა დაიწყოს. ჩვენ ორიენტირებული ვართ იმაზე, რომ კლიენტს მაქსიმალურად სწორი პროდუქტი შევარჩევინოთ.
ხე არის ბუნებრივი, ერთ ეკოსისტემაში ვცხოვრობთ, ჩვენი ცხოვრების განუყრელი ნაწილია და ვფიქრობ, რომ ხის მიმართ ინტერესი მზარდია.
ბევრს შიში აქვს იმის, რომ ხის მასალის გამოყენების შემდეგ არ მოხდეს პროდუქტის დაზიანება, დეფორმაცია და რისკი არ მიადგეს კლიენტის მიერ გაწეულ ინვესტიციას, მაგრამ ჩვენს მიერ სწორად შერჩეული მასალისა და პროდუქტის შემთხვევაში, ეს რისკი მინიმალურია,“ - აცხადებს გიორგი სრესელი.
მისი თქმით, „ეკოვუდის“ პირველი მიზანი იყო, რომ კომპანიას იმპორტზე დამოკიდებულება თანდათან შეემცირებინა. „ახლა დამუშავებული ხის მასალის იმპორტს ნაკლებად ვახდენთ, გადაუმუშავებელი ხის მასალის შემოტანა ხდება და შემდგომ ხდება ჩვენი რესურსით დამუშავება“, - განაცხადა გიორგი სრესელმა.
„ჩვენი მიზანია არ შევეხოთ ქართული ტყის მასივებს, არც ერთი კვადრატული მეტრი არ გვაქვს გადამუშავებული ქართული ხე. მხოლოდ და მხოლოდ იმპორტზე ვმუშაობთ, გვინდა გავუფრთხილდეთ ჩვენი ტყის მასივს და ეკოლოგიას. ეს დასაქმებულთა რაოდენობაზე არ მოქმედებს, ადგილობრივ ხეზე იმუშავებ, თუ შემოტანილზე, ეს მუშახელზე არ აისახება და ვფიქრობ, რომ ჩვენს მიერ არჩეული პოზიცია მართებულია“, - აცხადებს გიორგი სრესელი.
„ნატახტრის საწარმოს გარდა, „ეკოვუდს“ აქვს შოურუმი თბილისში წყალსადენის N21-ში, სადაც ადგილობრივი მარაგებით, რესურსით და კეთილგანწყობით ველოდებით ყველას“, -აცხადებს გიორგი სრესელი.