რუსეთ-უკრაინის ომმა ბიზნესის ყველა სფეროს შეუქმნა პრობლემა. ნატურალური ხის მასალის მიმწოდებელი კომპანია ,,ეკოვუდი“ კიდევ ერთი ქართული ბიზნეს სუბიექტია, რომელიც რუსეთიდან იმპორტს აჩერებს.  რაც შეეხება ალტერნატიულ ბაზრებს, როგორც კომპანიის კორპორაციული გაყიდვების და მარკეტინგის ხელმძღვანელი  გიორგი სრესელი აცხადებს, ბაზარი მცირე დონეზე დივერსიფიცირებული იყო და ამიერიდან მოუწევთ ბიზნესის გადაწყობა აფრიკის, მალაიზიის და ევროპის რამდენიმე ქვეყნის ბაზრებზე, თუმცა პროდუქციის ფასი გაიზრდება.

,,ხის მასალების იმპორტი რაღაც დონეზე დივერსიფიცირებული იყო, თუმცა ძირითადი წილი რუსეთს უჭირავს. საბოლოო ჯამში, ძალიან რთულია რუსული ბაზრის დაკარგვა, თუნდაც ფასიდან გამომდინარე, რუსული ხის მასალა  შედარებით იაფია და ლოგისტიკაც ადვილი იყო. პროდუქცია  ციმბირიდან შემოგვქონდა, ამ დროისთვის გვრჩება ძველი ნაშთები და გზაში მყოფი ტვირთი, შესყიდვები ამ ეტაპზე გავაჩერეთ. სამომავლოდ ალტერნატიულ ბაზრებზე უფრო მეტად გავაქტიურდებით და ბიზნესიც თანდათან მოძებნის ნიშას. გეოგრაფიული ფაქტორიდან გამომდინარე,  სხვა ბაზრებზე ტრანსპორტირების ხვედრითი წილი ფასში მაღალია,  ვიდრე რუსეთიდან.  ამ ეტაპზე აფრიკის ქვეყნებიდან საზღვაო-საკონტეინერო გადაზიდვები დაახლოებით 30%-ით არის გაძვირებული. დამატებით ვმუშაობთ, რომ ალტერნატიული წყაროები შევთავაზოთ მომხმარებელს, ფასებს მაქსიმალურად ვინარჩუნებთ  და ვცდილობთ  მომხმარებელს ხელმისაწვდომობა არ შეეზღუდოს, გლობალური პრობლემებია, რასაც ჯერჯერობით როგორმე ვუმკლავდებით“, - ამბობს გიორგი სრესელი ,,კომერსანტთან“.

რაც შეეხება ალტერნატიულ წყაროებს, სრესელის თქმით, შესაძლებელია ადგილობრივი წარმოების უფრო მეტად განვითარება, რა მხრივაც ,,ეკოვუდმა“ საკმაოდ წინ წაიწია და არსებულ გამოწვევას საკუთარი წარმოების გაფართოებით ცდილობს.

,,რთულ სიტუაციაშია არა მხოლოდ საქართველო, არამედ მთელი მსოფლიო, სავაჭრო ურთიერთობებში პრობლემაა, ამიტომ ადგილობრივი წარმოებაც შეიძლება უფრო მეტად განვავითაროთ.  ვმუშაობთ, რომ ხის მასალების დამზადება და დაპროფირება უშუალოდ ადგილზე მოხდეს. ნატახტარში ვფლობთ  წარმოებას, რომელიც ბოლო ფაზაშია, მალე ჩაეშვება და რუსული პროდუქტის ჩანაცვლებას უფრო გაგვიადვილებს. გავლენას განიცდის უკლებლივ ყველა სფერო, ჩვენ ახალი პროექტები შევაჩერეთ, ხოლო  მიმდინარე პროექტები შენელებულია. შესაბამისად, მოთხოვნაც და შემოსავლებიც განახევრდა, რეალურად ძალიან ცუდი სიტუაციაა“, - აცხადებს გიორგი სრესელი.

შეგახსენებთ, რომ „ეკოვუდი”  წარმოადგენს ნატურალური ხის მასალებისა და ხის დასამუშავებელი ლაქ-საღებავების ერთ-ერთ უმსხვილეს იმპორტიორს საქართველოში, ექსკლუზიური უფლებით პირდაპირ მწარმოებლებისგან.     

კომპანია მომხმარებელს სთავაზობს პოლონური, რუსული, აფრიკული და უკრაინული წარმოშობის ნატურალურ, ეკოლოგიურად სუფთა ხის მასალებისა და ლაქ-საღებავების ფართო არჩევანს სახლის, აგარაკის, რესტორნისა თუ სასტუმროს რემონტისთვის. 

მარი ჩიტაია