პირველად ნატოს ისტორიაში ალიანსის გენერალურ მდივნად ქალი შეიძლება აირჩიონ. ინფორმაციას ამის შესახებ ესპანური გაზეთი El Pais-ი დიპლომატიურ წყაროებზე დაყრდნობით ავრცელებს.
როგორც ესპანური გამოცემა იუწყება, ალიანსის შიგნით ფართო კონსენსუსი არსებობს იმის თაობაზე, რომ ნატოს გენერალური მდივნის თანამდებობაზე იენს სტოლტენბერგი ქალმა უნდა ჩაანაცვლოს.
ნატოს მომავალი გენერალური მდივნის კანდიდატის შესახებ მოლაპარაკებები შემოდგომას დაიწყება.
„ფართო კონსენსუსი არსებობს იმის შესახებ, რომ იენს სტოლტენბერგის შემცვლელი, რომელიც ნატოს მომავალ სამიტზე მადრიდში უნდა აირჩიონ, ქალი უნდა იყოს“, - განუცხადა ესპანურ გამოცემას დიპლომატიურმა წყარომ.
როგორც გაზეთი El Pais-ი იუწყება, ნატოს მომავალი გენერალური მდივნის შესაძლო კანდიდატებად შემდეგი პირები განიხილებიან: დიდი ბრიტანეთის ყოფილი პრემიერ-მინისტრი ტერეზა მეი, ევროკავშირის დიპლომატიური სამსახურის ყოფილი ხელმძღვანელი ფედერიკა მოგერინი, გერმანიის თავდაცვის მინისტრი ანეგრეტ კრამპ-კარენბაუერი.
გამოცემის ინფორმაციით, მომავალი გენერალური მდივნის კანდიდატურის განხილვისას მოკავშირეებს შორის ყველაზე მეტად დიდი ბრიტანეთის ყოფილი პრემიერ-მინისტრის, ტერეზა მეის სახელი ჟღერს.
ალიანსის მოქმედ გენერალურ მდივანს, იენს სტოლტენბერგს მანდატი 2022 წელს ეწურება. ის ნატოს გენერალური მდივნის თანამდებობას 2014 წლიდან იკავებს.
19 ივლისს გამოცემა Politico-მ ნატოს გენერალური მდივნის თანამდებობაზე შესაძლო კანდიდატები დაასახელა. გამოცემა Politico-მ აღნიშნა, რომ ზოგიერთი მაღალჩინოსანი, დიპლომატი და ანალიტიკოსი ამბობს, რომ 72 წლის შემდეგ, დროა ალიანსმა პირველი ქალი გენერალური მდივანი დანიშნოს. Politico-ს განცხადებით, ხორვატიისა და ლიეტუვის ყოფილი პრეზიდენტები, კოლინდა გრაბარ-კიტაროვიჩი და დალია გრიბაუსკაიტე და ესტონეთის მოქმედი პრეზიდენტი, კერსტი კალულაიდი, შესაძლოა, ნატოს გენერალური მდივნის თანამდებობაზე კანდიდატებად განიხილონ.