უკრაინის პრეზიდენტის, ვოლოდიმირ ზელენსკი 5 მარტს ვირტუალურ შეხვედრას გამართავს აშშ-ის სენატორებთან, იტყობინება CNN-ი საკუთარ წყაროებზე დაყრდნობით.

ცნობით, აშშ-ის დემოკრატმა და რესპუბლიკელმა სენატორებმა ამგვარ შეხვედრაში მონაწილეობის მიწვევა მიიღეს. მიწვევა გაავრცელა აშშ-ში უკრაინის საელჩომ.

უკრაინაში საომარი მდგომარეობა გამოცხადდა 24 თებერვალს მას მერე, რაც რუსეთის არმიამ, პრეზიდენტ ვლადიმირ პუტინის ბრძანებით, იერიში მიიტანა უკრაინაზე. რუსეთის ოფიციალური ფორმულირებით, ეს არის „სპეცოპერაცია დონბასში“, რომელიც უკრაინის სეპარატისტული, რუსეთის მიერ აღიარებული ერთეულების თხოვნით დაიწყო.

4 მარტს უკრაინის პრეზიდენტმა მძაფრად გააკრიტიკა ნატო იმის გამო, რომ ალიანსმა არ იკისრა უკრაინის თავზე ფრენისგან თავისუფალი ზონის შექმნა, რაც მას კიევმა არაერთხელ სთხოვა. „არ ვიცი ვისი დაცვა შეგიძლიათ, შეძლებთ თუ არა საკუთარი და ალიანსის წევრი ქვეყნების დაცვას,“ - მიმართა მან ჩრდილოატლანტიკური ალიანსის წევრებს.

უკრაინის პრეზიდენტის განკარგულებით, ქვეყანაში საყოველთაო მობილიზაცია გამოცხადდა. დასავლეთის ქვეყნებმა ეკონომიკური სანქციები დაუწესეს რუსეთს. რუსეთი აცხადებს, რომ არ აქვს უკრაინის ოკუპაციის გეგმა და რომ მისი მიზანია ამ ქვეყნის „დემილიტარიზაცია და დენაციფიკაცია“. რუსეთის ავიაცია და არტილერია ბომბავს ქალაქებს და სამოქალაქო ობიექტებს.