ელექტრონული კომერციის კანონპროექტი, რომელიც ევროკავშირის დირექტივაა, ჯერ კიდევ 2020 წელს უნდა განხილულიყო, თუმცა, გარკვეული მიზეზები გამო, პროცესი ამ დრომდე გაჭიანურდა. ამჟამად მთავრობამ აღნიშნულ კანონპროექტზე მუშაობა დაასრულა.

როგორც რადიო „კომერსანტის“ დილის ეთერში ელექტრონული კომერციის ასოციაციის თანადამფუძნებელმა მაია ხელაძემ განაცხადა, ელექტრონულ კომერციას მხოლოდ ეს კანონი ვერ დაარეგულირებს. ეს მხოლოდ ჩარჩოა და მან ბევრ სხვა კანონთან ერთად უნდა იმუშაოს, რომ ერთად შექმნას ის სინერგია, რაც ქვეყანაში ელექტრონული კომერციის განვითარებას გამოიწვევს და არა დათრგუნვას. ამ დოკუმენტმა, ელექტრონული კომერციის პროცესში, მომსახურების მიმღების - მომხმარებლის, უფლებების დაცვა უნდა უზრუნველყოს და მომსახურების მიმწოდებლისთვის კონკრეტული ვალდებულებები განსაზღვროს.

„კანონი მიმწოდებლების მხრიდან გამოკვეთილ პასუხისმგებლობას ითხოვს. მათ შორის, ადგენს, როგორ უნდა მოხდეს დისტანციური ხელშეკრულებების გაფორმება ონლაინ გაყიდვების დროს. ამიტომ, თუ ამ კანონის მოთხოვნები სათანადოდ არ იქნება მიტანილი ონლაინ გამყიდველებამდე და სათანადოდ არ იქნა მომხმარებელთა უფლებების და ასევე, ეროვნული ბანკის მიერ დაწესებული კანონის აღსრულება, რომელიც კომერციული ბანკების მიერ გადახდების პროცესს არეგულირებს, მაშინ შეიძლება ახალმა კანონმა უკუეფექტი მოგვცეს. ამ მოთხოვნებმა ონლაინ გამყიდველების მხარე შეიძლება დათრგუნოს და შეაშინოს, რადგან ახალ კანონში მათ მხარეს მეტი პასუხისმგებლობაა“, -  განაცხადა მაია ხელაძემ „კომერსანტის“ ეთერში.

მისი თქმით, თუ კანონის აღსრულება სწორად მოხდა, გამყიდველსაც ეცოდინება ის თამაში წესები, რომელსაც უნდა ემორჩილებოდეს. ამიტომ, ძალიან მნიშვნელოვანია, რომ მხარეებს კანონის მოთხოვნილი ჩარჩოების და პასუხისმგებლობის გაგებაში დავეხმაროთ.

„ჩვენი ასოციაციის სახელით ვამბობ იმას, რომ ეს კანონი კარგი ნაბიჯია იმისთვის, რომ კიდევ უფრო წინ წავიდეთ, გავაფართოოთ ის შესაძლებლობები, რაც ჩვენს ქვეყანას ონლაინ გაყიდვების, ყიდვისა და გაყიდვის თვალსაზრისით აქვს“, - განაცხადა მაია ხელაძემ.

მაია ხელაძემ იმედი გამოთქვა, რომ კანონპროექტი პარლამენტი თებერვალში, საგაზაფხულო სესიების გახსნის შემდეგ განიხილება, გარკვეული მუხლები შეიძლება დაკორექტირდეს და  კანონი პარლამენტმა შესაძლოა საგაზაფხულო სესიაზე მიიღოს.