სტარტაპ Theranos-ის დამფუძნებელს, ელიზაბეტ ჰოლმსს, რომელსაც თაღლითობისთვის შარშან ნოემბერში 11 წლით თავისუფლების აღკვეთა მიესაჯა, ჯერ კიდევ არ დაუბრუნებია საკუთარი კომპანიისგან მიღებული თანხა. მისი ვალი 25 მილიონ დოლარზე მეტადაა შეფასებული. ამის შესახებ CNBC-ი წერს.
ჰოლმსი ახლახან დაესწრო სასამართლო სხდომას. ამის შემდეგ ცნობილი გახდა, რომ გასული წლის დეკემბერში მის წინააღმდეგ კიდევ ერთი სარჩელი შეიტანეს. ამჯერად მას საკუთარი კომპანიის წინაშე დავალიანებაში ედება ბრალი.
საქმის მასალებში ნათქვამია, რომ ჰოლმსმა 2011 წელს Theranos-ის აღმასრულებელი დირექტორისგან ორი ვექსილი მიიღო, ჯამურად 15 მილიონ დოლარზე მეტი, ხოლო 2013 წელს — კიდევ 10 მილიონი დოლარი. მას 2016 და 2018 წლებში სრულად უნდა დაეფარა ვალები. მაგრამ 2016 წელს Theranos-მა გადასახადების გადახდის ვადა კიდევ 5 წლით გაახანგრძლივა. პირველ ორ სესხზე ჰოლმსს უკვე ვადაგადაცილება აქვს, მესამე კი 2023 წლის დეკემბრამდე უნდა დაფაროს. მოსარჩელე ირწმუნება, რომ ქალმა თანხის დაბრუნების არაერთი მოთხოვნა უგულებელყო.
გასული წლის ნოემბერში ჰოლმსს 11 წლით თავისუფლების აღკვეთა მიესაჯა თაღლითობისა და ინვესტორების შეცდომაში შეყვანისთვის. სასამართლოს გადაწყვეტილებით, მან სასჯელის მოხდა 27 აპრილს უნდა დაიწყოს. მთელი ამ ხნის განმავლობაში, ჰოლმსი აგრძელებს ცხოვრებით ტკბობას კომფორტულ სასახლეში, რომლის მოვლის ღირებულება თვეში 13 000 დოლარად არის შეფასებული.
2023 წლის დასაწყისში იგი ეჭვმიტანილი იყო შეერთებული შტატების უკანონოდ დატოვების მცდელობაში. რის შემდეგაც მას ჩამოართვეს ცალმხრივი ბილეთი მექსიკის მიმართულებით.
თებერვალში მან მეორე შვილი გააჩინა. ამ მოტივით ახლა ადვოკატები სასამართლოს სასჯელის მოხდის დაწყების გადადებას ითხოვენ.