დიდი ბრიტანეთის დედოფალი ელიზაბეტ II ტახტის მემკვიდრეს, უელსის პრინც ჩარლზს სახელმწიფოს მეთაურის მოვალეობის ნაწილის გადასცემს. ამის შესახებ The Sunday Times-ი იტყობინება.
გამოცემამ ასეთი დასკვნა მას შემდეგ გააკეთა, რაც 10 წელზე მეტი ხნის განმავლობაში პირველად, ბუკინგემის სასახლის მიერ გამოქვეყნებულ მონარქის ოფიციალურ მოვალეობათა სიაში მნიშვნელოვანი ცვლილებები შევიდა.
მანამდე ის შედგებოდა მოვალეობების 13-პუნქტიანი ჩამონათვლისგან, რომელიც მოიცავდა პრემიერ-მინისტრის ოფიციალურ დანიშვნას, პარლამენტის ახალი სესიების გახსნაში მონაწილეობას, სახელმწიფო ვიზიტებს და შეხვედრებს გაერთიანებულ სამეფოში და სხვა მოვალეობებს.
ახლა დოკუმენტი შეიცავს მხოლოდ ზოგად ფორმულირებას, რომლის მიხედვითაც დედოფალს აქვს „არაერთი საპარლამენტო და დიპლომატიური მოვალეობა“. ამასთან, სასახლის გამოცემის წყარომ განაცხადა, რომ ეს იყო მხოლოდ დოკუმენტის „მცირე განახლება“.
მაისში 73 წლის პრინცმა ჩარლზმა პარლამენტის სესიის გახსნაზე პირველად შეცვალა ელიზაბეტ II, რომელიც მისი სახელით სიტყვით გამოვიდა. დედოფალი ამ ცერემონიას 59 წლის განმავლობაში პირველად არ ესწრებოდა. წელს ჩარლზი დედის ნაცვლად ასევე იმყოფებოდა სხვა ღონისძიებებზე, რომლებიც ტრადიციულად მონარქის მონაწილეობას მოითხოვს და ელიზაბეტ II-ის განრიგში იყო.
96 წლის დედოფალს მოგზაურობისა და ხანგრძლივი ღონისძიებების შემდეგ ზურგის ტკივილი და დისკომფორტი აწუხებს. ბოლო აუდიენციის დროს დედოფალმა აღიარა, რომ სიარული უჭირდა, თუმცა ეს ხუმრობად წარმოადგინა. გასული წლის ოქტომბერში ელიზაბეტ II რვა წლის განმავლობაში პირველად მოხვდა საავადმყოფოში, რაც სამედიცინო შემოწმების საჭიროებით აიხსნა. ამის შემდეგ, ექიმების დაჟინებული მოთხოვნით, დედოფალმა დროებით უარი თქვა შორეულ მოგზაურობებზე, გაცილებით ნაკლებად იღებდა მონაწილეობა საჯარო ღონისძიებებში და პირველად მრავალი წლის განმავლობაში საზოგადოებაში ხელჯოხით გამოჩენა დაიწყო. თებერვალში მისმა უდიდებულესობამ კორონავირუსი გადაიტანა.
2022 წელი სამეფოში პლატინის საიუბილეო წელია - ელიზაბეტ II-ის ბრიტანეთის ტახტზე ასვლის 70 წლისთავი. თარიღი ფართოდ აღინიშნა 2-დან 5 ივნისამდე პერიოდში. თავად დედოფალი ორჯერ გამოჩნდა ბუკინგემის სასახლის აივანზე, მაგრამ გამოტოვა წმინდა პავლეს ტაძარში ღვთისმსახურება და სამეფო რეზიდენციაში მის პატივსაცემად გამართული გალა კონცერტი.