თბილისში, გურამიშვილის გამზირზე მდებარე 22 ჰექტარის ფართობზე არსებული ელმავალმშენებლის ქარხანა 19.5 მილიონ ლარად განმეორებით აუქციონზე საქართველოს ბანკმა შეიძინა. ობიექტი აღსრულების ეროვნულმა ბიურომ პარასკევს გაყიდა, მას შემდეგ რაც პირველი აუქციონი, რომელზეც ქარხნის ქარტივები 49 მილიონ ლარად იყიდებოდა, ჩაიშალა.
აღსრულების ეროვნული ბიუროს შეფასებით, ქარხნის აქტივები 97.6 მილიონ ლარს შეადგენდა, შესაბამისად ის 80%-იანი ფასდაკლებით გაიყიდა.
“ელმავალმშენებლის” ქარხანა აუქციონზე გადაუხდელი ვალდებულებების გამო გამოვიდა. საქალაქო სასამართლოს 9 იანვრის განჩინებიდან ირკვევა, რომ ელმავალმშენებელ ქარხანას “საქართველოს ბანკის” მიმართ 15 მილიონი ლარის საკრედიტო დავალიანება აქვს, ასევე კომპანიას გააჩნია 20 მილიონის ვალი სხვა კრედიტორთა მიმართაც.
საქართველოს ბანკის ინფორმაციით, თუკი ისინი არ შეიძენდნენ ამ უძრავ ქონებას, მაშინ ბანკი შესაბამის მოთხოვნის უფლებას დაკარგავდა.
„აღსრულების ეროვნული ბიუროს მიერ მოწყობილ საჯარო აუქციონზე, სს „ელმავალმშენებლის“ ქონების რეალიზაცია და მის საფუძველზე გამოცემული განკარგულება სრულ შესაბამისობაშია მოქმედი კანონმდებლობის ნორმებთან. იმის გათვალისწინებით, რომ მეორე განმეორებითი აუქციონის უშედეგოდ დასრულების შემთხვევაში, კრედიტორი - სს „საქართველოს ბანკი“ დაკარგავდა მოთხოვნის დაკმაყოფილების შესაძლებლობას, აუქციონზე მოვალის ქონება, კრედიტორული ინტერესების დაცვის მიზნით და კანონმდებლობის მოთხოვნათა სრული დაცვით, შეიძინა სს „საქართველოს ბანკმა“, — აცხადებენ ბანკში.
აქამდე “ელმავალმშენებლის” 87%-იანი წილი ოფშორში რეგისტრირებულ რუსულ კომპანია “ლოკო ტრანსს” ეკუთვნოდა. კომპანიის 12%-იან წილს კი სახელმწიფო ქონების ეროვნული სააგენტო ფლობს. თუმცა აუქციონის პარალელურად, ერთი დღით ადრე, 15 მარტს თბილისის საქალაქო სასამართლომ ელმავალმშენებელ ქარხანასთან დაკავშირებით, შპს „თბილისი ტრანსფერის“ სასარგებლოდ დაუსწრებელი გადაწყვეტილება გამოიტანა. სასამართლომ შპს „თბილისი ტრანსფერის“ სარჩელი დააკმაყოფილა და კომპანიასა და Loko Trans Company LTD (ლოკო ტრანს კომპანის) შორის, 2022 წლის 16 მარტს დადებული აქციების ყიდვა-გაყიდვის შესახებ ხელშეკრულება #1, ფასიანი ქაღალდების რეესტრში დაარეგისტრირა. გადაწყვეტილების შედეგად შპს „თბილისი ტრანსფერი“ გახდა სს ელმავალმშენებლის აქციათა 87% მესაკუთრე.
კომპანია „თბილის ტრანსფერის“ დამფუძნებელი და დირექტორი ირაკლი ჭითანავა „კომერსანტთან“ აცხადებდა, რომ აუქციონის ასეთი სახით ჩატარება ბევრ კითხვის ნიშანს აჩენს და კორუფციაზე მიუთითებს, ამიტომ ის სასამართლო დავის დაწყებას გეგმავს. მისი თქმით, ახალი კომპანია საქმიანობის გაგრძელებას და ელმავლების წარმოებას ვერ შეძლებს, თუმცა ალბათ ამის სურვილი არც აქვს, რადგან ჭითანავას ინფორმაციით, ქარხნის ადგილას საცხოვრებელი კორპუსის მშენებლობა იგეგმება.