„ხვალ პროდუქტი რა ფასად უნდა გავყიდოთ პროგნოზს ვერ ვაკეთებთ. ეროვნული ვალუტის მნიშვნელოვანი გაუფასურების გამო ჰიგიენური ქაღალდი აუცილებლად გაძვირდება“,- ამის შესახებ „კომერსანტს“ შპს „ჯი ემ ბილდინგის“ გენერალურმა დირექტორმა თემურ მინდორაშვილმა განუცხადა. პროფესიონალური სარეცხი და ჰიგიენის საშუალებების მწარმოებელ - იმპორტიორ კომპანიაში ამბობენ, რომ ეროვნული ვალუტის მკვეთრი გაუფასურება ბიზნესს დიდ დარტყმას აყენებს.

„ზოგადად ქვეყანაში ყველაფერი გაძვირდა, თუმცა ამას ახლა ლარის კურსი ემატება, შესაბამისად ისედაც გაზრდილ პროდუქტის ფასს დამატებით მინიმუმ 20 პროცენტით გაიზრდება. ზოგი ამ ნამატს ჯიბიდან გადაიხდის, ზოგი ღია კონკურენციაში არ ჩაებმება და თუ პროდუქტს ლარად ყიდდა ახლა 1,2 ლარად გაყიდის, ასეთი კი ძალიან ბევრია.  ყოველთვის ვდცილობთ გარკვეული თანხა წინასწარ მოვიმარაგოთ, ახალაც გარკვეული თანხა ვიყიდე რამაც გადამარჩინა. თუმცა დოლარი, რომ არ მქონდეს ნაყიდი დღეს ძალიან დიდი ზარალი მექნებოდა. ველოდებით, რომ გაუფასურებულ ლარს, მესამე ტალღა დაემატება და კიდევ უფრო რთულ მდგომრეობაში აღმოვჩნდებით“, - განუცხადა „კომერსანტს“ თემურ მინდორაშვილმა.

პროდუქციის ფასი რომ გაიზრდება ადასტურებს საქართველოში  „FERRERO ROSHEN“–ის ოფიციალური დისტრიბუტორი კომაპნია. თუმცა „ბიდი კომპანის“ წილის მფლობელი, დიმიტრი მესხიშვილი აცხადებს, რომ ამ ეტაპზე არ იციან პროდუქციას რამდენით გააძვირებენ. კომპანიაში მოლოდინი აქვთ, რომ ეროვნული ვალუტა გაუფასურებას კიდევ უახლოეს მომავალშიც გააგრძელებს და არ დასტაბილურდება.

„ჩვენ იმპორტიორები ვართ და რა თქმა უნდა ლარის კურსის გაუფასურება საქმიანობაზე ნებისმიერ შემთხვევაში ნეგატიურად აისახება. ეროვნული ვალუტის გაუფასურება დღეს ხომ არ გაჩერდება? გარკვეული პერიოდი ჩვენც დავაკვირდებით როგორ განვითარდება მოვლენები. პროდუქტის ფასზე მხოლოდ ლარის კურსი არ მოქმედებს, ამას ემატება საწვავის ხარჯი, იჯარის გადასახადი. საკითხს კომპლექსურად უნდა მიდგომა, ამიტომ ახლა ზუსტ თანხას თუ როგორ გაძვირდება პროდუქტი ვერ გეტყვით. ლარი რაღაც ნიშნულზე ცოტა ხნით მაინც უნდა დასტაბილურდეს, უნდა დაველოდოთ რა მოხდება საწვავის ბაზარზე და სხვა დანახარჯების კუთხით, გადაწყვეტილებას სწორედ ამის მიხედვით მივიღებთ“, - განმარტავს დიმიტრი მესხიშვილი.

ბაჩო ადამია