დღევანდელი მოხმარების პირობებში ენგურჰესს ელექტროენერგიაზე აფხაზეთის მოთხოვნის დაკმაყოფილება არ შეუძლია. ამის შესახებ ელექტროსადგურის დირექტორმა ლევან მებონიამ განაცხადა.
„2018 წლის მაისში აფხაზეთმა დახარჯა 100,3 მლნ. კვტ.ს. ენერგია, 2019-ში 100 მლნ., აი 2020-ში კი - 158 მლნ. რაც შეეხება 2021 წელს, მაისში აფხაზეთში ყველა დროის რეკორდი მოიხსნა - მოხმარებამ 208 მლნ. კვტ.ს. შეადგინა. ანუ, 2020 წელთან შედარებით ზრდამ 40% შეადგინა, ხოლო 2019-თან შედარებით 100%“, - განაცხადა მებონიამ.
მისივე თქმით, ჰესის სიმძლავრეების ასეთი მოხმარების დაკმაყოფილებისთვის მზად არაა, მაშინაც კი, თუ საქართველოს დანარჩენი მომხმარებელი სექტემბერ-აპრილში არც ერთ კვტ.საათს არ მიიღებს.
ელექტროსადგურის დირექტორი მიიჩნევს, რომ შექმნილი ვითარებიდან ერთადერთი გამოსავალია ენერგიის აღრიცხვა, ტარიფის დადგენა და გადაუხდელობის გამო ენერგიის მიწოდების შეწყვეტა. სხვა გამოსავალი არ არსებობს და თუ ეს არ გაკეთდა, აფხაზეთში ისევ ენერგოდეფიციტია მოსალოდნელი.
„ელექტროენერგია, ისევე, როგორც ნებისმიერ სხვა პროდუქტი, ფული ღირს. 1 მეგავატის სიმძლავრის ელექტროსადგურის აშენება 1,5 მლნ. დოლარი ღირს. აფხაზეთი დეკემბერში 400 მლნ. კვტ.ს.-ს მოიხმარს, ეს კი 100 მეგავატის სიმძლავრეებს მოითხოვს. მთელი ეს ხარჯები დაფარვას მოითხოვს, თუმცა, ეს რეალურად არ ხდება“, - განაცხადა მებონიამ.
მისი პროგნოზით, როდესაც წყალსაცავში წყლის დონე დაიწევს, აფხაზეთი ელექტროენერგიის მიწოდებაში კიდევ უფრო მკაცრი შეზღუდვების შემოღება გარდაუვალი იქნება - არაა გამორიცხული, რომ იანვარ-თებერვალში ელექტროენერგიის გათიშვამ დღე-ღამეში 10 საათს მიაღწიოს.
„ენგურჰესის და „ჩერნომორენერგოს“ ხელმძღვანელობა მოვლენათა განვითარების სხვადასხვა ვარიანტებს, მათ შორის მსხვილი მომხმარებლებისთვის - ძირითადად კრიპტოვალუტების მაინერებისთვის - საბაზრო ფასებში ელექტროენერგიის იმპორტს განიხილავს. დარწმუნებული ვარ, რომ ეს აფხაზეთის ენერგოსისტემაზე დატვირთვას მნიშვნელოვნად შეამცირებს, თანაც მომხმარებლებს ძაბვის და სიხშირის კუთხით ხარისხიანი ელექტროენერგია ექნება“, - მიიჩნევს ლევან მებონია.
მან აღნიშნა, რომ ენგურჰესის სადერივაციო გვირაბს შეკეთების შედეგად, ელექტროსადგურის მუშაობაში დანაკარგების 30-35%-ით, ანუ წელიწადში 100 მლნ. კვტ.სთ.-ით შემცირება მოხერხდა.
„ადრე შეთანხმებული იყო სადგურის მიერ გამომუშავებული ენერგიის ბალანსი - 40% აფხაზეთს, 60% - დანარჩენ საქართველოს. თუმცა, ბოლო წლებში აფხაზურ მხარეს უკვე 50% მიჰქონდა, 2021 წელს კი უკვე 70%, თანაც უფასოდ. დარჩელი 30%-დან მიღებული შემოსავალი ელექტროსადგურის მუშაობისთვის სრულიად არასაკმარისია“, - ამბობს ლევან მებონია.
მისი თქმით, თუ ეს მდგომარეობა მომავალშიც შენარჩუნდება, ელექტროსადგური ვერ იმუშავებს. მებონიას პროგნოზით, მოხმარების არსებული მასშტაბების შენარჩუნების შემთხვევაში წლის მანძილზე აფხაზეთში ენერგოდეფიციტი 400 მლნ. კვტ.სთ.-მდე გაიზრდება.
ამ დროისთვის აფხაზეთში ენერგიის მიწოდების საკმაოდ რბილი განრიგი მოქმედებს - ენერგომიწოდება ღამით 2 საათით, და დილით 2 საათით წყდება, მაგრამ ტურისტული სეზონის დასრულების შემდეგ შეზღუდვები გამკაცრდება.
ოკუპირებული აფხაზეთის მთავარი ენერგოკომპანიის „ჩერნომორენერგო“-ს პროგნოზის თანახმად, ელექტროენერგიის იმპორტი რუსეთიდან აუცილებელი უკვე ნოემბერში გახდება.
წყარო: sputnik-abkhazia.ru
ენგურჰესი
