აშშ-ის ალერგიისა და ინფექციური დაავადებების ცენტრის დირექტორმა, ენტონი ფაუჩიმ განაცხადა, რომ არავაქცინირებულ პირებს შორის კორონავირუსის „დელტა“ ვარიანტის თავისუფლად გავრცელებამ ვირუსის უფრო მძლავრი ვარიანტი შეიძლება გამოიწვიოს, რამაც ვაქცინირებულ პირებს ზიანი შეიძლება მიაყენოს.

„დელტა“ ვარიანტმა უკვე წარმოშვა მცირე ვარიანტი, რომელიც ცნობილია როგორც „დელტა პლუსი“ და რომელსაც სპაიკ-ცილის მუტაცია შეენიშნება, რამაც მისი უფრო სწრაფად გავრცელება შეიძლება გამოიწვიოს. ჯერჯერობით, ეს ვარიანტი რამდენიმე ქვეყანაში მხოლოდ რამდენიმე შემთხვევაში გამოვლინდა, მაგრამ „დელტას“ თავდაპირველი ვარიანტი შეერთებულ შტატებში სწრაფად გავრცელდა და დომინანტური შტამი გახდა.

ჯერჯერობით, ჯანდაცვის ოფიციალური პირები ამტკიცებენ და კვლევები ცხადყოფენ, რომ ვაქცინირებული პირები სერიოზული დაავადებებისგან, ჰოსპიტალიზაციისა და სიკვდილისგან დაცულნი არიან.

„არსებობს პრინციპი, რომელიც ვირუსოლოგიაში ყველამ იცის: ვირუსი მუტაციას არ განიცდის, თუ გამრავლების საშუალებას არ მისცემთ. საბედნიეროდ, ვაქცინები საკმაოდ კარგად მოქმედებენ „დელტა“ ვარიანტის წინააღმდეგ, განსაკუთრებით მძიმე დაავადებებისგან დაცვის კუთხით, მაგრამ თუ ვირუსს ცვლილებების გაგრძელების საშუალებას მივცემთ, ეს დაუცველობამდე მიგვიყვანს და შესაძლოა, უარესი ვარიანტი მივიღოთ, რაც შემდეგ გავლენას მოახდენს არა მხოლოდ არავაქცინირებულებზე, არამედ აცრილებზეც, რადგან ასეთ ვარიანტს ვაქცინით უზრუნველყოფილი დაცვა შეუძლია გაარღვიოს“, - აღნიშნა აშშ-ის ალერგიისა და ინფექციური დაავადებების ცენტრის დირექტორმა.

ენტონი ფაუჩიმ ამერიკელებს მოუწოდა, რაც შეიძლება მალე გაიარონ ვაქცინაცია, რათა კორონავირუსისგან თავი დაიცვან.

imedinews.ge