ტატო ახალკაციშვილის ექსპოზიცია სახელწოდებით”ექსცენტრული მოგზაური” დიმიტრი შევარდნაძის სახელობის ეროვნულ გალერეაში გამოიფინება. ექსპოზიცია 70-მდე ნამუშევარს აერთიანებს. გამოფენაზე წარმოდგენილი იქნება, როგორც ფერწერული ტილოები, ასევე გრაფიკული ნახატები. ექსპოზიციის საშუალებით დამთვალიერებელი მეტაფორულად სხვადასხვა ადგილას იმოგზაურებს: ჯავახეთში, გარეჯის უდაბნოში, აეროდრომსა და ალეგორიული მნიშვნელობით, სულებით დასახლებულ ტყეში.
ტატო ახალკაციშვილის სოლო გამოფენას კულტურის ცენტრი ATINATI’S წარადგენს. სწორედ ATINATI’S და დ.შევარდნაძის სახელობის ეროვნული გალერეის თანამშრომლობით ექსპოზიცია 18 დეკმებერს - 15:00 სთ-ზე გაიხსნება და დამთვალიერებელს ნამუშევრების ნახვა 8 იანვრის ჩათვლით შეეძლება.
გახსნა: 18 დეკემბერი 2021 - 15:00
დახურვა: 8 იანვარი 2022
მის:დ.შევარდნაძის სახელობის ეროვნული გალერეა - შოთა რუსთაველის N 11
გამოფენის ფარგლებში დაგეგმილია ტატო ახალკაციშვილის კატალოგის პრეზენტაციაც, რომელიც 29 დეკემბერს დიმიტრი შევარდნაძის სახელობის ეროვნულ გალერეაში მოეწყობა. ღონისძიება გაგრძელდება ATINATI’S კულტურის ცენტრში (გალერეიდან 7 წუთის სავალზე) სადაც, ე.წ ATINATI Talk-ის ფორმატში არტისტთან და ექსპოზიციის კურატორთან აუდიტორია ღია საუბრის გამართვას შეძლებს.
დრო: 29 დეკემბერი 2021 - 17:00 (კატალოგის პრეზენტაცია) 19:00 - ATINATI Talks
მის:პ.ინგოროყვას N19
გამოფენის შესახებ: ექსცენტრული მოგზაური / Eccentric Traveler მოგზაურობა წარსულში, მომავალში, დროის მიღმა, ჯავახეთში, გარეჯის უდაბნოში, აეროდრომსა და სულებით დასახლებულ ტყეებში, მიტოვებულ შენობებსა და უსასრულო ტრასებზე, მარშალის კუნძულებზე და უცხო რიტუალებში, საკუთარსა და სხვის სიზმრებში. ტატო ახალკაციშვილი უცნაური მოგზაურია, შეგიყვანთ იმ სურათებში, რომლებსაც არც კარები აქვთ და არც გასაღები, ან არ შეგიშვებთ გადაშლილ პეიზაჟებში, რომლის წინ უნდა დადგეთ და დაელოდოთ დროს, როცა ისინი ამეტყველდებიან. მისი მხატვრობა ექსცენტრული და მგრძნობიარეა, წარმოსახვა - ფართო და მაძიებელი. რამდენიმე მოტივზე აგებული ექსპოზიცია ვითარდება მოგზაურობის ცნების პოეტურსა და ფილოსოფიურ ხედვებზე აღმოცენებული ვიზუალური შესატყვისებით. ამავდროულად ეს არის მოგზაურობა ახალი აღმოჩენებით ფერწერის უსასრულო შესაძლებლობებში.
კურატორი - ხათუნა ხაბულიანი
ტატო ახალკაციშვილის ბიოგრაფია:
ტატო ახალკაციშვილი დაიბადა 1979 წელს, ქ. თბილისში. 1996 - 2003 - სწავლობდა თბილისის სახელმწიფო სამხატვრო აკადემიაში.
2004 - 2006 - შემოქმედებითი ჯგუფის „ფიგურატიული ხელოვნების სახელოსნო“ - ს წევრი. 2003 - 2007 - ცხოვრობდა და მუშაობდა გერმანიაში.
ამჟამად ხელოვანი ცხოვრობს და მუშაობს თბილისში. 2003 წლიდან ტატო ახალკაციშვილის ნამუშევრები რეგულარულად იფინება როგორც საქართველოში, ისე მის ფარგლებს გარეთ. ევროპაში, იაპონიასა და აშშ-ში, სადაც ის ხელოვნების ბაზრობებში, პერსონალურ და ჯგუფურ გამოფენებში იღებს მონაწილეობას. სხვადასხვა დროს ტატო ახალკაციშვილს თავისი ნამუშევრები წარდგენილი ჰქონდა შემდეგ თანამედროვე ხელოვნების ბაზრობებზე: Vienna Contemporary (2017), Art Genève (2018), Art Dubai (2018, 2019). მისი ნამუშევრები გაიყიდა ფილიფსის აუქციონზე (2017).
ტატო ახალკაციშვილს მონაწილეობა აქვს მიღებული ეროვნული მუზეუმის ჯგუფურ და სოლო პროექტებში
(2013, 2016, 2017).
ტატო ახალკაციშვილის ნამუშევრები დაცულია ქართული სახვითი ხელოვნების მუზეუმში, ასევე მნიშვნელოვან კერძო კოლექციებში, როგორც საქართველოში, ასევე მის საზღვრებს გარეთ.
(R)