ლარი გამყარებას განაგრძობს, 9 თებერვალს თბილისის დროით 10:30 საათისთვის Bloomberg-ის სავაჭრო პლატფორმაზე 1 აშშ დოლარის ღირებულება 2.9025-ს შეადგენდა. დღეს მოქმედი ოფიციალური კურსია $1/2.92 ლარი. ბოლო 1 წელიწადში ლარი დოლართან მიმართებაში 11%-ით, 1-ლი იანვრიდან დღემდე კი 5.7%-ით გამყარდა. როგორ აისახება ეს პროცესი ექსპორტიორ კომპანიებზე, ამის შესახებ “კომერსანტთან“ ქართული დასალევი ხილ-ბოსტნეულის „კეთილი და პატიოსანი”  მწარმოებელი კომპანიის  დირექტორმა გიორგი ახალაძემ ისაუბრა. 

მისი თქმით, ეს ტენდენცია ექსპორტიორი კომპანიებისთვის კარგი არ არის, რადგან პროდუქტი უცხოურ ვალუტაში იყიდება. თუმცა, გიორგი ახალაძე ფიქრობს, რომ გამყარებას გრძელვადიანი ტენდენცია არ ექნება.

„ექსპორტისთვის კურსის  გამყარება მაინცდამაინც  კარგი  ტენდენცია არ  არის, რადგან ადგილობრივი  პროდუქცია უცხოურ  ვალუტაზე იყიდება,  მაგრამ  არ მგონია რომ ეს  გრძელვადიანი ტენდენცია  იყოს, ვფიქრობ რომ მოკლევადიანია და სტაბილურობა უფრო მოსალოდნელია, ვიდრე გამყარდება. 

ჩვენი დიდი სავაჭრო პარტნიორები ვინც არიან, მაგალითად რუსეთი, მათთან საკმაოდ არასტაბილური პოლიტიკური პროცესებია, თურქეთის ლირაც საკმაოდ არასტაბილურია და კარგ პროცესებს არ განიცდის.

ლარის გამყარება ალბათ უფრო გადმორიცხვებით, ან რეფინანსირების კურსის ზრდით არის გამოწვეული. როგორც ჩანს, ამ ორმა ფაქტორმა იმუშავა გამყარებაზე, თუმცა ამ პროცესს ვფიქრობ იმპორტის ზრდა გააჩერებს და ამის ფარგლებში იმერყევებს. ვინც იმპორტზე მუშაობს, მისთვის კარგი ტენდენციაა”, -  აღნიშნა გიორგი ახალაძემ.

„კეთილი და პატიოსანი“ რამდენიმე ქვეყანაში მათ შორის ყატარში, რუსეთში და ბრიტანეთში გადის, კომპანია ამ ეტაპზე კონტრაქტს აშშ-ის ბაზარზე შესასვლელად ამზადებს და სამომავლოდ საფრანგეთში და გერმანიაში შესვლასაც გეგმავს. 

„დიდ ბრიტანეთში გვაქვს ექსპორტი,  კონტრაქტის მომზადების და ჩამოსხმის პროცესში ვართ და აშშ-ში შევდივართ, გარდა ამისა ვგეგმავთ გერმანიაში და საფრანგეთში  შესვლასაც. 

ამ ეტაპზე რუსეთში მიმდინარეობს გამოფენა და იქ ვიღებთ მონაწილეობას“, -  აღნიშნა გიორგი ახალაძემ.

კეთილი და პატიოსანი გურჯაანის რაიონში სოფელ ჩუმლაყში ქართული აგროპროდუქტის საწარმოში მზადდება. ის ბაზარზე  2020 წლის ზაფხულში 6 გემოთი გამოჩნდა, მიმდინარე  წელს  კომპანიამ ახალი გემო მარწყვის, ჩიას და ვაშლის ნაზავი დაამატა, რომელსაც ახალაძის თქმით ძალიან კარგი გამოხმაურება მოჰყვა, გაზაფხულიდან კეთილი და პატიოსანის გემოებს ციტრუსი და ჭარხალი დაემატება.

თაკო კვაჭანტირაძე