„2022 წლის ივლისის ჩათვლით ექსპორტზე სულ გასულია 115 ტონაზე მეტი თაფლი, რაც დაახლოებით 486 000 დოლარზე მეტია“ - ამის შესახებ „კომერსანტს“ საქართველოს მეფუტკრეთა გაერთიანების ხელმძღვანელმა ალეკო პაპავამ უთხრა. მისი თქმით, თაფლის ექსპორტით დაინტერესებული ქვეყნები ძირითადად ბულგარეთი, საფრანგეთი,  საუდის არაბეთი, იაპონია და ისრაელია.

„ექსპორტით დაინტერესებული ქვეყნებია ბულგარეთი, საფრანგეთი. ამ ორ ქვეყანაში საქართველოდან  თაფლის ყველაზე დიდი რაოდენობაა გასული. გარდა ამისა თაფლი გადის საუდის არაბეთში, იაპონიაში, არაბთა გაერთიანებულ საამიროებში. დაინტერესებულია გერმანია, სადაც უკვე 1 ტონამდე თაფლია გასული და გამოჩნდა ისრაელიც, სადაც 4 ტონაზე მეტი თაფლი გავიდა“, - აღნიშნა ალეკო პაპავამ

რაც შეეხება თაფლის ხარისხს, ალეკო პაპავა ამბობს, რომ საქართველოში თაფლის ხარისხი გაუმჯობესებულია და უკეთესობისკენ მივდივართ. მისივე თქმით, მინიმალური რისკების აღმოსაფხვრელად საჭიროა მეტი სიმძლავრეები და აღრიცხვის დამკვიდრება. 

„ევროკავშირის სტანდარტებს ვაკმაყოფილებთ თუნდაც ამ ექსპორტირებული თაფლის 80% ევროკავშირის ქვეყნებშია გასული. ძირითადად ეს ქვეყნებია ბულგარეთი და საფრანგეთი, საფრანგეთი ზოგადად თაფლის ყველაზე დიდი მეწარმეა და რა რაოდენობის თაფლსაც ჩვენ ვაწარმოებთ საფრანგეთი იმ რაოდენობას ერთ თვეში ყიდის სხვა ქვეყნებში, ბულგარეთშიც  არის საწარმოები და თაფლის გადამამუშავებელი ქარხანა და ის ამარაგებს იტალიას და კიდევ რამდენიმე ქვეყანას.

ევროკავშირის  ქვეყნები საქართველოსგან ძირითადად ითხოვს აკაციის თაფლს, რომელიც ფაქტობრივად უკვე ამოყიდულია, 100 ტონაზე მეტი აკაციის თაფლია  საექსპორტო დანიშნულებით დამზადებული“, - აღნიშნა ალეკო პაპავამ

პაპავას თქმით, წელს თურქეთში 23 აგვისტოდან 28 აგვისტოს ჩათვლით  ტარდება ღონისძიება, სადაც 127 ქვეყნიდან მეფუტკრეები, თაფლით და სხვა პროდუქტებით მოვაჭრე კომპანიები იქნებიან წარმოდგენილები და საქართველო 8 კომპანიით  მიიღებს მონაწილეობას.

„ეს არის მსოფლიო კონგრესი, სადაც 127 ქვეყნიდან  მეფუტკრეები, თაფლით მოვაჭრეები, ის კომპანიები რომლებიც  ინვენტარს ამზადებენ იკრიბებიან, საქართველოდან  წარდგენილი  იქნება 8 ქვეყანა.  ამ  მხრივ  ძალიან დიდი  დახმარება  გაგვიწია სოფლის  მეურნეობის  განვითარების  სააგენტომ, რომელმაც  ფართი აიღო და  რვა  ქართული კომპანია თავისი პროდუქტებით საუკეთესო  ზონაში  წარდგება.

იმედი მაქვს,  რომ ამ  მხრივ  წასვლა  გვექნება,  რადგან  ქართული  თაფლის  ექსპორტი  დაიწყო  2019 წელს, პირველი გაცნობა  მოხდა კანადაში მსგავს ღონისძიებაზე და ახლა ამ თურქეთის მერე მგონია, რომ  უფრო ფართო მასშტაბებზე  გავალთ.

ჩვენ ვმუშაობთ  წაბლის  თაფლის იმპორტზე, წელს  წაბლის თაფლი  სამწუხაროდ ბუნებრივი პირობებიდან გამომდინარე  ბევრი ნალექი იყო ქვეყანაში და ძალიან მცირე რაოდენობა მივიღეთ, ასევე  აქცენტის გაკეთება გვინდა ყვავილის თაფლზე და ამის ბაზრებიც უნდა მოვიძიოთ.

ზოგადად ქართული თაფლის ცნობადობა უნდა გაიზარდოს ამაზე გვაქვს  სამუშაო, საელჩოები უნდა ჩაერთონ ამ პროცესში და ნებისმიერი პატარა  აქტივობა, საგამოფენო მაგიდაზე განთავსებაც კი მნიშვნელოვანია ჩვენთვის“, - აღნიშნა ალეკო პაპავამ

თაკო კვაჭანტირაძე