საქართველოში იანვარ-აპრილში ექსპორტის მოცულობა, გასული წლის ანალოგიურ პერიოდთან შედარებით, 32.8%-ით $1.588 მლრდ-მდე გაიზარდა, იმპორტი კიდევ უფრო მეტად 33.7%-ით $3.666 მლრდ-მდე, საგარეო ვაჭრობის ბრუნვა კი 33.4%-ით $5.254 მლრდ-მდე. წლის პირველ 4 თვეში უარყოფითმა სავაჭრო ბალანსმა ბრუნვის 39.6 პროცენტი - $2.079 მლრდ შეადგინა. საექსპორტო პარტნიორებში ჩინეთმა პირველი ადგილი განიმტკიცა და წილი 18.3%-მდე გაზარდა. ამის შესახებ ინფორმაციას საქსტატი ავრცელებს.

იანვარ-აპრილში ჩინეთში ექსპორტი 46.4%-ით $290 მლნ-მდე გაიზარდა, რაც მეორე ადგილზე მყოფ აზერბაიჯანთან შედარებით $122 მლნ-ით და მესამე ადგილზე მყოფ რუსეთთან შედარებით $134 მლნ-ით მეტია. იმავე პერიოდში 42.8%-ით $324 გაიზარდა ჩინეთიდან იმპორტიც. აპრილში აღარ, მაგრამ მარტში საქართველომ ჩინეთთან დადებითი სავაჭრო ბალანსი აჩვენა.

საქსტატის მონაცემებით ჩინეთში ყველაზე მოთხოვნადი სპილენძის მადნებია, მისმა ექსპორტმა იანვარ-აპრილში $240 მლნ-ს მიაღწია და 82.7%-იანი დომინანტური წილი დაიკავა. სპილენძის მადნები რეალურად რეექსპორტია, საქართველო მას სომხეთიდან ყიდულობს და მცირედი გადამუშავების შემდეგ ჩინეთში ყიდის. მეორე ადგილს $24 მლნ-ით ძვირფასი ლითონები იკავებს, გაყიდული ღვინის ღირებულება კი მხოლოდ $4.3 მლნ-ს შეადგენს.

ჩინეთთან თავისუფალი ვაჭრობის ხელშეკრულება 2018 წლის 1-ლი იანვრიდან ამოქმედდა. ქვეყანა საექსპორტო პარტნიორებში პირველ ადგილს 2020 წლიდან იკავებს.

პირველი ათი საექსპორტო პარტნიორიდან ოთხი თვის ჯამში რუსეთთან უმნიშვნელო 0.4%-იანი კლება ფიქსირდება, უკრაინასთან 45%-იანი. უკრაინაში ექსპორტი მართალია მარტთან შედარებით გაორმაგდა, მაგრამ გასული წლის აპრილთან შედარებით მაინც 89%-ით შემცირდა. რუსეთისა და უკრაინის გარდა დანარჩენ 8 ქვეყანაში პოზიტიური დინამიკა ფიქსირდება. იანვარ-აპრილში სომხეთში ექსპორტი 102%-ით გაიზარდა და $109 მლნ-ს მიაღწია, შეერთებულ შტატებში კი 130%-იანი მატების შემდეგ $88 მლნ-ს. 198%-ით $42 მლნ-მდეა გაზრდილი ექსპორტი ყაზახეთშიც. თუმცა რეკორდი მაინც პერუს ეკუთვნის სადაც ექსპორტი 1842%-ით $62 მლნ-მდე გაიზარდა.