პრეზიდენტმა სალომე ზურაბიშვილმა ეროვნული ბანკის შესახებ კანონს ვეტო დაადო. პრეზიდენტის შეფასებით, ჩნდება ეჭვი, რომ თუ მის მიერ წარდგენილ კანდიდატურებს არ ექნება პარლამენტის მხარდაჭერა, კანონი იძლევა შესაძლებლობას, პირველმა ვიცეპრეზიდენტმა განუსაზღვრელი ვადით შეასრულოს ეროვნული ბანკის პრეზიდენტის მოვალეობა.

„ეროვნული ბანკის შესახებ“ კანონპროექტის ინიციატორი პაატა კვიჟინაძე მედიასთან აცხადებს, რომ საჭიროა საკითხზე კიდევ ერთხელ მსჯელობა და საერთო პოზიციაზე შეჯერება. დეპუტატი არ გამორიცხავს, რომ შესაძლოა ვეტოს დაძლევის საჭიროება არც გახდეს.

„გირჩის“ ერთ-ერთი ლიდერი, ალექსანდრე რაქვიაშვილი კი მიიჩნევს, რომ ხელისუფლება ამ კანონს ეკონომიკის ყოფილი მინისტრისთვის იღებდა, ვინაიდან ნათია თურნავა ეროვნული ბანკის დროებით მმართველად უნდოდათ დაენიშნათ.

ფინანსისტი, თავისუფალი უნივერსიტეტის ბიზნესსკოლის დეკანი გიგა ბედინეიშვილი „კომერსანტთან“ აღნიშნავს, რომ მთავრობის ნაბიჯები მიმართულია იმისკენ, რომ კიდევ უფრო შეამციროს ეროვნული ბანკის დამოუკიდებლობა და ამისთვის ყველაფერზეა წამსვლელი.

„მთავრობის ნაბიჯები მიმართულია იმისკენ, რომ კიდევ უფრო შეამციროს ეროვნული ბანკის დამოუკიდებლობა და ამისთვის ყველაფერზეა წამსვლელი, ნუ თუ საერთოდ არსებობს ეს დამოუკიდებლობა. ახლანდელი პრეზიდენტი რომ წავა, სანამ ახალზე შეთანხმდებიან, უნდათ რომ აქტიური კონტროლი ჰქონდეთ ეროვნულ ბანკზე და ეს კონტროლი არ დაკარგონ. გარდა ამისა, ისეთ მექანიზმს ატარებენ, რომ ამ კონტროლის გატარებას შემდგომშიც ძალიან შეუწყოს ხელი, ამიტომ ყოველმხრივ არასწორი და ცუდია. თუმცა აქ მეორე საკითხიცაა, სავალუტო ბანკს რატომ მიაჩნია, რომ აქამდე ეროვნული ბანკის ქმედებები მისასალმებელი იყო, ეროვნული ბანკის ადმინისტრაცია არასწორ ნაბიჯებს დგამს, არასწორ პოლიტიკას ატარებს, არასწორ საბანო ზედამხედველობას ახორციელებს, ზედმეტი ინტერვენციულობით გამოირჩევა და ა.შ. ვფიქრობ, შედეგებიც აჩვენებს, რომ ეროვნული ბანკის დამოუკიდებლობა დიდი ეჭვის ქვეშ დგას და ქვეყანაში მაღალი ინფლაციაა,რაც სებ-ის პირდაპირი პასუხისმგებლობაა. როგორ შეგვიძლია ეროვნულ ბანკზე საერთოდ რამე ვთქვათ როცა სამიზნე 3%-ს ნაცვლად ორნიშნა ინფლაცია გვაქვს“, — აღნიშნავს გიგა ბედინეიშვილი.

საქართველოს პრეზიდენტის ყოფილი მრჩეველი, ფინანსისტი თემურ ბასილია „კომერსანტთან“ეროვნული ბანკის კანონში დაჩქარებული წესით შეტანილ ცვლილებებზე ამბობს, რომ ამჟამად მოქმედ კანონში საკადრო საკითხების გადაწყვეტის საკმაოდ გამართული მექანიზმია ჩამოყალიბებული და დამატებითი ცვლილებები საჭირო არ არის.

„სიმართლე გითხრათ, არა თუ ამ ცვლილების დაჩქარებულად მიღების, არამედ, საერთოდ, ამ ცვლილების აუცილებლობასაც ვერ ვხედავ. საქართველოს ეროვნული ბანკის ამჟამად მოქმედ კანონში საკადრო საკითხების გადაწყვეტის საკმაოდ კარგი და გამართული მექანიზმია ჩამოყალიბებული“, — აღნიშნავს თემურ ბასილია.

ეროვნული ბანკის ყოფილი პრეზიდენტი რომან გოცირიძე ამბობს, რომ სალომე ზურაბიშვილის მიერ ვეტოს დადება სწორი ნაბიჯია, რადგან ეროვნულ ბანკში გადატრიალება მზადდება, რაც უზარმაზარ რისკს უქმნის ქვეყნის მაკროეკონომიკურ სტაბილურობას და ანადგურებს მის დამოუკიდებლობას.

ახალი კანონი ეროვნულ ბანკში პირველი ვიცე-პრეზიდენტის პოსტს ამკვიდრებს. კანონის თანახმად, პირველ ვიცე-პრეზიდენტს სებ-ის პრეზიდენტის არყოფნის პირობებში პრეზიდენტის უფლებამოსილების შესრულება შეუძლია განუსაზღვრელი ვადით. ახალი კანონი ეროვნულ ბანკთან ერთად საერთაშორისო სავალუტო ფონდმაც გააკრიტიკა.