საქართველოს ეროვნული ბანკის მონეტარული პოლიტიკის კომიტეტმა 2023 წლის 1 თებერვალს მონეტარული პოლიტიკის განაკვეთის უცვლელად 11.0%-ზე დატოვების გადაწყვეტილება მიიღო.
რადიო „კომერსანტის“ დილის ეთერში ეკონომიკური ტრანსფორმაციის ცენტრის დამფუძნებელმა ნოდარ სირბილაძემ განაცხადა, რომ ეს გადაწყვეტილებას მისთვის მოულოდნელი არ ყოფილა, მაგრამ „გამკაცრებული მონეტარულ პოლიტიკა“ მისთვის მაინც პირობითი ცნებაა, რადგან გამკაცრებულმა მონეტარულმა პოლიტიკამ უნდა შეამციროს რეფინანსირების სესხებზე მოთხოვნა, მაგრამ ბოლო წლებში ეს მოთხოვნა მზარდია და სწორედ ეროვნული ბანკის მონეტარული პოლიტიკაა დამნაშავე იმაში, რომ ინფლაცია მის მიზნობრივ დონეზე ვერ დავიდა.
„მონეტარული პოლიტიკის გამკაცრების მიუხედავად, კომერციულ ბანკებს არ ექმნებათ იმის პრობლემა, რომ ცენტრალური ბანკიდან ერთკვირიანი რეფინანსირების სესხები აიღონ. კლასიკური გაგებით, გამკაცრებულმა მონეტარულმა პოლიტიკამ უნდა შეამციროს რეფინანსირების სესხებზე მოთხოვნა, მაგრამ ბოლო წლებში ეს მოთხოვნა მზარდია. ანუ ფაქტობრივად ეს მექანიზმი, რომელიც ერთგვარი ჩამკეტი და ინფლაციის შემაკავებელი უნდა იყოს, რეალურად ამ მუშაობს. ეს გამკაცრება პირობითია. რეფინანსირების სესხები კომერციული ბანკების ერთგვარ სუბსიდირების მექანიზმად გადაიქცა“, - განაცხადა ნოდარ სირბილაძემ.
მისი თქმით, საქართველოში ინფლაცია მიზნობრივ მაჩვენებელზე მაღალია, ამის პარალელურად ხელფასების მაჩვენებელი იზრდება, მაგრამ ძალიან დაბალი ტემპით და მოსახლეობის მსყიდველობითი უნარი, ხშირ შემთხვევაში, არ იცვლება ან მცირდება.
ნოდარ სირბილაძემ ისიც თქვა, რომ ხელფასების გავლენა ინფლაციაზე ფიქციაა. რადგან ქვეყანაში ინფლაცია კვლავ მაღალია და ხელფასების მატება ვერ აბალანსებს ფასების ზრდის დონეს.
„მიუხედავად იმისა, რომ ხელფასების მატება შეინიშნება, რატომ გვაქვს კადრების დეფიციტი? იმიტომ, რომ ინფლაცია კვლავ მაღალია და ხელფასების მატება ვერ აბალანსებს ფასების ზრდის დონეს. ის, რომ ხელფასებს გავლენა აქვს ინფლაციაზე, ეს ფიქციაა. არ შეიძლება შენს მოსახლეობას, რომლის მსყიდველობითი უნარი ყოველდღიურად მცირდება, ეს ინფორმაცია მიაწოდო. იმ მოსახლეობას, რომლის მსყიდველობითი უნარის და კეთილდღეობის შემცირება ზუსტად ეროვნული ბანკის ბრალია და, ცხადია, ეროვნული ბანკია მთავარი დამნაშავე. ინფლაციაზე საგარეო ფაქტორებიც მოქმედებს, მაგრამ ეროვნული ბანკის მონეტარული პოლიტიკაა დამნაშავე იმაში, რომ უკანასკნელი წლების განმავლობაში ინფლაცია ვერ დავიყვანეთ მის მიზნობრივ დონეზე, რაც არის 3%-ის ფარგლებში“, - განაცხადა ნოდარ სირბილაძემ.
მოამზადა მაკა ბიბილაშვილმა