გარემოს დაცვისა და სოფლის მეურნეობის სამინისტროს ეროვნული სატყეო სააგენტოს თანამშრომლების „COVID-19“-ის საწინააღმდეგო ვაქცინაციის პროცესი გრძელდება. ინფორმაციას ეროვნული სატყეო სააგენტო ავრცელებს.

 
სამცხე-ჯავახეთის სატყეო სამსახურის თანამშრომლებს - 20 მეტყევეს „COVID-19“-ის საწინააღმდეგო აცრა ახალციხის ევექსის რეფერალურ ჰოსპიტალში ჩაუტარდათ.

ეროვნული სატყეო სააგენტოს უფროსის, არჩილ ნიკოლეიშვილის განცხადებით, ეროვნული სატყეო სააგენტოს თანამშრომლების ვაქცინაციის პროცესი მთელი ქვეყნის მასშტაბით მიმდინარეობს.

„ქვეყნის სტაბილური განვითარებისთვის პანდემიის მართვა და მისი სწრაფი დასრულება აუცილებელია. ვაქცინაცია სწორედ ამაში გვეხმარება. ჩვენს მეტყევეებს უმნიშვნელოვანესი როლი აკისრიათ, განსაკუთრებით ამ პერიოდში, როდესაც გარემო პირობების გამო, ტყის ხანძრების რისკი ძალიან დიდია. უწყების თანამშრომელთა ვაქციანაცია მნიშვნელოვანია როგორც მათი ჯანმრთელობის დაცვის, ასევე სააგენტოს მაქსიმალურად შეუფერხებლად საქმიანობისთვის”, - განაცხადა არჩილ ნიკოლეიშვილმა.

ვაქცინაციის პროცესს სახელმწიფო რწმუნებული სამცხე-ჯავახეთში ბესიკ ამირანაშვილი დაესწრო - “დღეს, გარემოს დაცვისა და სოფლის მეურნეობის სამინისტროს ეროვნული სატყეო სააგენტოს თანამშრომლები „COVID-19“-ის საწინააღმდეგო ვაქცინით აიცრნენ, ინფიცირების მაჩვენებელი ისევ და ისევ იზრდება ქვეყანაში, მათ შორის ჩვენს რეგიონშიც, მოვუწოდებ ჩვენს მოსახლეობას, რომ აიცრას, გავუფრთხილდეთ ერთმანეთს და დავიცვათ გარშემომყოფები,” - განაცხადა სახელმწიფო რწმუნებულმა.