„საქართველოს წინააღმდეგ რუსეთის ჰიბრიდული ომი არც 2008 წელს, არც 2014 და არც 2022 წელს დაწყებულა – ჰიბრიდული ომი იმდენი წლისაა, რამდენისაც დამოუკიდებელი საქართველო“, - ამის შესახებ რადიო „კომერსანტის“ ეთერში, გიორგი აბაშიშვილის საავტორო გადაცემაში “ბიზნესინსაიდერი“ საქართველოს უსაფრთხოების პოლიტიკის ინსტიტუტის ხელმძღვანელმა დავით ბრაგვაძემ განაცხადა. მისი თქმით, რუსეთის ეს მიდგომა დროთა განმავლობაში იცვლება და პერიოდულად უფრო და უფრო ხისტი ხდება.
„ჩვენ ვხედავთ, რომ სანქციებში მყოფი რუსეთის მაღალი თანამდებობის პირები რაღაც გარკვეულ საქებარ სიტყვებს არ იშურებენ საქართველოსა და მისი ხელისუფლების მიმართ, ამბობენ რომ ჩვენ სანქციებს არ ვუერთდებით და ეს დაგვიფასდება. ზოგადად, უსაფრთხოების სფეროს ექსპერტები ხშირად ვუსვამთ ხაზს, რომ ეს პოლიტიკურად ძალიან წამგებიანია და სასიცოცხლო მნიშვნელობის პროდუქტების მიმართ ჩვენი დამოკიდებულება, მაგალითად საწვავზე, ნავთობ პროდუქტებზე, ხორბალზე, პურპროდუქტებზე საქართველოს რუსეთისგან წამოსული საფრთხეების წინაშე მოწყვლადს ხდის. მე არ გამოვრიცხავ, რომ თუ დასავლეთიდან საქართველოზე ზეწოლა გაიზარდა და საქართველოს მოუწია იმ სანქციებთან მიერთება, რომელსაც ჯერ არ ვუერთდებით, ეს რუსეთის მხრიდან ჩვენ წინააღმდეგ იქნება გამოყენებულიყო და შესაძლოა, რომ ჩვენი მოქალაქეების ყოფა გაუარესდეს“, - აღნიშნა დავით ბრაგვაძემ.
მან აღნიშნა, რომ ეროვნული უსაფრთხოებისთვის ეკონიმიკა ბერკეტია და რაც შეეხება საინფორმაციო ომის ნაწილს, საკითხავია თუ რამდენად მზად არის ქართული საზოგადოება ჰიბრიდული ომისთვის.
„მიუხედავად იმისა, რომ უკრაინის ბრძოლამ და თავდადებამ და უკრაინის ხელისუფლების მიერ წარმოებულმა საინფორმაციო კამპანიამ მუხტი ასწია, აღმოჩნდა, რომ საქართველოში წიგნიერების დონე დაბალია, ეს არ არის საქართველოს ბრალი, შეიძლება ადამიანი განათლებული იყოს მაგრამ პროპაგანდაში ადვილად გაებას.
გუშინ შაქარი იყო, ჩვენ ვნახეთ როგორ დაიწყეს ადამიანებმა შაქრის მომარაგება, ხვალ შეიძლება იგივე მდგომარეობა გვქონდეს საწვავზე და ა.შ. ეს იყო საინფორმაციო კამპანიის ნაწილი. ასევე იყო რძის პროდუქტების რუსულ ბაზარზე შეტანის კამპანიაც, არადა ჩვენ თვითონ ვიცით, რომ ცოტა გვაქვს რძის პროდუქტი, მაგრამ მეორეს მხრივ საინფორმაციო კამპანიის ეს რაუნდიც წავაგეთ და ძალიან ხისტი განცხადებები მივიღეთ კიევიდან, ასეთ შეცდომებს არ უნდა ვუშვებდეთ“, - აღნიშნა დავით ბრაგვაძემ.
მისივე თქმით, როგორც არ უნდა დასრულდეს რუსეთ-უკრაინის კონფლიქტი, რუსეთი როგორც სამხედრო, ისე ეკონომიკური თვალსაზრისით დასუსტებული გამოვა, თუმცა ეს არ ნიშნავ იმას, რომ საქართველოსთვის საფრთხე ქრება.
„რუსული სამხედრო ფაქტორი კავკასიაში საკმაოდ ძლიერი რჩება და შესაძლებელია განვიხილოთ ყველაზე რთული სცენარები საქართველოსთვის, შეიძლება ყარაბაღის შემთხვევაში მოინდომონ მათი ე.წ. სამშვიდობოების გატარება საქართველოს გავლით და რას ვშვებით ჩვენ ამ დროს? ის განცხადებები, რაც პერიოდულად გვესმის, არ იძლევა დიდი ოპტიმიზმის საშუალებას. ჩვენ რამდენად მზად ვართ ამ გამოწვევებისთვის და დასუსტებულ რუსეთთან როგორ მოვიქცევით, ამას ბევრი დაფიქრება სჭირდება და ამ ეტაპზე რასაც ვხედავთ არის ის, რომ ჩვენი სახელმწიფოს მზაობა ძალიან დაბალია ამ არსებული გამოწვევების ფონზე და მუდმივად ვლაპარაკობთ მშვიდობაზე და ეს ჟღერს ისე რომ ოღონდ ომი არ იყოს – ყველაფრისთვის მზად ვართ“, – თქვა დავით ბრაგვაძემ.
თაკო კვაჭანტირაძე