ჯანდაცვის მინისტრმა, ზურაბ აზარაშვილმა რუსთავი 2 - ის ეთერში განაცხადა, რომ რესპუბლიკური საავადმყოფო მნიშვნელოვან ჩარევას საჭიროებს და მის გარშემო ატეხილი აჟიოტაჟი უსაფუძვლოა, რადგან თანამშრომლებს აქვთ გარანტია, რომ სამუშაო ადგილები და ხელფასები შეუნარჩუნდებათ. ეს განცხადებები ჯანდაცვის მინისტრმა "კურიერი პიესში" გააკეთა.
როგორც მინისტრმა აღნიშნა, ის, რომ რესპუბლიკური საავადმყოფო თანამშრომლებს ხელფასები და სამუშაო ადგილები შეუნარჩუნდებათ, აღნიშნული გარანტია მათ უპირველეს ყოვლისა, პრემიერ-მინისტრისგან მათ აქვთ და ეს შეთავაზება დღესაც მოქმედია.
"რაც შეეხება რესპუბლიკურ საავადმყოფოსთან დაკავშირებულ მოვლენებს - ჩვენ გვაქვს ძალიან პრინციპული და მნიშვნელოვანი მიზანი სახელმწიფო სამედიცინო სექტორის განვითარებისთვის, რისი ძირითადი ფლაგმანიც დღეს სამწუხაროდ არ არის რესპუბლიკური საავადმყოფო და ჩვენ ამ ცვლილებებით და დიდი რეფორმით, გვინდა რომ ქვეყანას ჰქონდეს მძლავრი, მაღალტექნოლოგიური კლინიკა, სადაც სახელმწიფო იქნება მნიშვნელოვნად წარმოდგენილი და ექნება სრულად, 100%-იანი მართვის პაკეტი.
წინასწარი და პირველადი შეფასებით რაც კი გვაქვს სხვადასხვა კომპეტენტური ორგანოებიდან არსებულის რეაბილიტაცია პრაქტიკულად შეუძლებელია და ამიტომ იყო ახალი კლინიკის აშენების საჭიროება. ახლა იმ ეტაპზე ვართ, რომ ამას სხვადასხვა ექსპერტები სწავლობენ და კიდევ უფრო ვრწმუნდებით ამ ჩვენ გადაწყვეტილებაში და საბოლოო გადაწყვეტილებას ამის შემდეგ მივიღებთ. ხმაური და ასეთი დამოკიდებულება ჩემი აზრით, ნაადრევია, მიტომ რომ დღეს ეს კლინიკა საჭიროებს სასწრაფო ჩარევას - ან რეაბილიტაციის მნიშვნელოვანი ტექნიკური გადაკეთებისა და ცვლილებების საფუძველზე ან მთლიანად დემონტაჟისა და ახლის აშენების საფუძველზე. აქედან გამომდინარე უნდა მივიღოთ გადაწყვეტილება იმ კომპეტენტური ექსპერტებისა და სხვადასხვა კრიტერიუმებიდან გამომდინარე. ვფიქრობ, რომ დღეს აჟიოტაჟის საფუძველი არ არსებობს, ვინმე უსამსახუროდ რჩებოდეს. ეს გარანტია ძალიან მკაფიოდ დაუფიქსირა პრემიერ-მინისტრმა, როდესაც თქვა, რომ მათ ექნებათ ღირსეული სამუშაო პირობები, ჩვენ შევთავაზებთ სხვადასხვა კლინიკებში დასაქმებას და იმ შემთხვევაში, თუ ვერ დასაქმდებიან დღევანდელი ხელფასის პირობებში გააგრძელებენ ახალი კლინიკის დასრულებამდე ხელფასების მიღებას," - განაცხადა ჯანდაცვის მინისტრმა.
ჯანდაცვის მინისტრმა ონკოლოგიურ მედიკამენტებზე არარეალისტურად გაზრდილ ფასებზეც ისაუბრა და მაგალითად დახურული ტენდერი მოიყვანა, რომელიც ჯანდაცვის სამინისტრომ გამოაცხადა და ოთხმა მომწოდებელმა 80 მედიკამენტზე ერთიდაიგივე ფასი დააფიქსირა.
„პირველადი შეფასება, რაც ონკომედიკამენტების ფასებთან დაკავშირებით არის და სერიოზული ეჭვი გაჩნდა, გახდა საფუძველი, რომ კონკურენციის სააგენტოს მოკვლევა დაეწყო. საქმე ეხება შეთანხმებულ მოქმედებას ფარმაცევტული კომპანიების მხრიდან. სამწუხაროდ, ეს აისახება ჩვენს მოქალაქეებზე, რადგან ფიზიკურად შეუძლებელია დიდი ფარმაცევტული კომპანიის გარდა დაწესებული ფასების მიღმა სადმე შეიძინო ონკოლოგიური მედიკამენტები.
ჯანდაცვის სამინისტროს აქვს ონკოლოგიური მედიკამენტების პროგრამა, ბიუჯეტი 87 მლნ ლარია და იქ შეიქმნა ეს პრობლემა. როცა ერთ დღეს, 15 მარტს, ოთხმა სხვადასხვა მომწოდებელმა, 80 ონკოლოგიურ მედიკამენტზე ზუსტად ერთიდაიგივე ფასი დააფიქსირა დახურული აუქციონის ტიპის ტენდერში. ეს ბადებს ეჭვს, რომ მოქმედება შეთანხმებული იყო და შეუძლებელია, რომ 1 ლარის სიზუსტით ამდენ მედიკამენტზე ამდენ კომპანიას მოსვლოდა აზრად და ერთი ფასი დაეწესებინა“, - განაცხადა ზურაბ აზარაშვილმა "რუსთავი 2"-ის ეთერში.