საწვავის გაზრდილი ფასების გამო, საქართველოში საქალაქთაშორისო და შიდა მგზავრობაზე ბილეთების ღირებულება გაიზარდა. ,,ბიზნესპრესნიუსთან“ საუბრისას ,,დიდუბის ავტოსადგურის“ ხელმძღვანელი, ნესტორ მიქატაძე ამბობს, რომ როცა საწვავის ფასმა 4 ლარს მიაღწია, რიგი მიმართულებებით მგზავრობა 10-15%-ით გააძვირეს.

„როცა საწვავის ფასმა 4 ლარს მიაღწია, მაშინ მძღოლების ნაწილმა, 10-15%-ით გააძვირა მგზავრთ გადაყვანები. ეს შეეხო თბილისი-ბათუმისა და თბილისი-ქუთაისის მიმართულებებს.

მიუხედავად იმისა, რომ მართლა ყველა მიმართულებით გაძვირდა ტრანსპორტი და საწვავის ფასების კუთხით კატასტროფული მდგომარეობაა, მეტად, ფიზიკურად ვერ გაიზრდება ფასი არალეგალური კონკურენციის გამო. ვგულისხმობ ე.წ. ხიშნიკებს, რომლებიც საბიუჯეტო გადასახადებს არ იხდიან და შესაბამისად, ბევრად იაფი უჯდებათ ფუნქციონირება. მოუხედავად იმისა, რომ სერიოზული პრობლემები გვაქვს, ბოლო 20 დღეა, ჩვენთან ფასები არ შეცვლილა“, - განუცხადა ნესტორ მიქატაძემ ,,ბიზნესპრესნიუსს“.

მგზავრების ინფორმაციით, დღეიდან, 70 თეთრით გაძვირდა რუსთავი თბილისის მარშრუტი.

,,ჯვარიპრესნიუსის“ ინფორმაციით კი, ბოლო 1 თვეში 100%-ით 2-დან 4-ლარამდე გაიზარდა ჯვარი-ზუგდიდის მიკროავტობუსის ღირებულება. ასევე, 2 ლარით არის გაზრდილი, ფოცხო-ზუგდიდი, ჯვარი-წალენჯიხა მიმართულებები. მათივე ინფორმაციით, არ შეცვლილა და ისევ 25 ლარია ჯვარი-თბილისის მარშრუტის ფასი.

,,ბიზნესპრესნიუსი“ ცდილობს გაარკვიოს, რა ღირს მგზავრთ გადაყვანები სხვა ქალაქებსა და რეგიონებში და შეიცვალა თუ არა ფასები, საწვავის გაძვირების პარალელურად.

BPN.GE