თურქეთში ფარმაცევტულ პროდუქტებზე ახალი ტარიფები დადგინდება — ბრძანება თურქეთის პრეზიდენტის რეჯეპ ტაეპ ერდოღანმა გამოსცა. აქამდე მოქმედი ბრძანების გადახედვის საჭიროება თურქული ლირის გაუფასურებიდან გამომდინარე დადგა.

რა გაველნა ექნება თურქეთში მედიკამენტებზე ფასების ზრდას, საქართველოს ფარმაცევტულ ბაზარზე?

„ფარმაცევტთა ასოციაციის“ აღმასრულებელი დირექტორი ილონა კოკიაშვილი „კომერსანტთან“ ამბობს, რომ აღნიშნული გადაწყვეტილება ქართულ ბაზარზე თურქეთიდან შემოტანილ მედიკამენტებს 30%-მდე გააძვირებს, ფასების ზრდა კი სავარაუდოდ ერთ თვეში ან აგვისტოს ბოლოდან აისახება.

„რამდენიმე დღის წინ თურქეთში მიღებული გადაწყვეტილება, რომელიც თურქული მედიკამენტების ზრდას გულისხმობს, რა თქმა უნდა საქართველოში შემოტანილ პროდუქციაზეც მოახდენს გავლენას. ფასები სავარაუდოდ 30%-ით გაიზრდება. გაძვირება დაახლოებით აგვისტოს ბოლოდან დაიწყება, რადგან ამ ეტაპზე არსებობს გარკვეული მარაგები, რომლებიც ფარმაცევტულ კომპანიებს აქვთ და ეს მყისიერი არ იქნება.

მიუხედავად ფასების ზრდისა, რომელიც თურქეთში არსებულმა მაღალმა ინფლაციამ და ლირის ასეთმა გაუფასურებამ გამოიწვია, ეს მედიკამენტები მაინც იაფიან სეგმენტში დარჩება და ევროპულთან შედარებით უფრო ხელმისაწვდომი იქნება ქართველი მომხმარებლებისთვის“, — ამბობს ილონა კოკიაშვილი.

თურქეთიდან იაფი მედიკამენტების იმპორტი ხუთი თვის წინ დაიწყო, დღეისათვის კი საქართველოს სააფთიაქო ქსელებში ხელმისაწვდომია თურქეთიდან იმპორტირებული 400-ზე მეტი დასახელების მედიკამენტი. მედიკამენტებზე ფასები 60% − 80%-მდე არის შემცირებული. ჯანდაცვის სამინისტროს სტატისტიკით, მხოლოდ მარტიდან 24 ივნისამდე 155 000-ზე მეტმა მოქალაქემ შეიძინა თურქეთიდან იმპორტირებული მედიკამენტები და ძველი ფასებით, 74 მილიონის ნაცვლად, დაახლოებით, 23 მილიონი ლარი გადაიხადა. შესაბამისად ამ პერიოდში მოქალაქეებმა 51 მლნ ლარი დაზოგეს.

ნინო თამაზაშვილი