აღდგომის დღესასწაულის შემდეგ წერეთლის გამზირის რეაბილიტაცია დაიწყება. ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.
კალაძის თქმით, გამზირის რეაბილიტაციასთან ერთად იგეგმება შალიკაშვილის ხიდის, ე.წ. დიდუბის ხიდის რეაბილიტაცია-განახლებაც.
„გაცნობებთ, რომ აღდგომის დღესასწაულის შემდეგ, დაიწყება აკაკი წერეთლის გამზირისა და შოთა შალიკაშვილის ხიდის რეაბილიტაცია. აკაკი წერეთლის გამზირზე, როგორც სხვა მსხვილი ინფრასტრუქტურული პროექტების შემთხვევაში, სრული რეაბილიტაცია განხორციელდება. კერძოდ, შეიცვლება და განახლდება მიწისქვეშა კომუნიკაციები, მათ შორის წყალმომარაგების, წყალარინებისა და გაზმომარაგების ქსელები; მოეწყობა სანიაღვრე ქსელი, მიწისქვეშ განთავსდება საჰაერო კაბელები, გამზირზე მოეწყობა გარეგანათების ახალი სისტემა და დამონტაჟდება თანამედროვე LED ლამპიონები; გზის სავალ ნაწილზე ასფალტის ახალი საფარი დაიგება, მოეწყობა ტროტუარები; ფეხით მოსიარულეთა უსაფრთხოდ გადაადგილების მიზნით, გაკეთდება საფეხმავლო კუნძულები, დაიხაზება ზებრა-გადასასვლელები, ხოლო საზოგადოებრივი ტრანსპორტისთვის გზის სავალი ნაწილიდან გამოიყოფა ავტობუსის ზოლი. გარდა ამისა, ჩატარდება გამწვანების სამუშაოები, გამზირზე არსებული ინფრასტრუქტურა ადაპტირდება შშმ პირებისთვის. წერეთლის გამზირის რეაბილიტაცია დედაქალაქის ბიუჯეტიდან 28 408 291 ლარით დაფინანსდება. აკაკი წერეთლის გამზირის განახლების პარალელურად, ვიწყებთ შოთა შალიკაშვილის სახელობის ე.წ. დიდუბის ხიდის რეაბილიტაციასაც. აღნიშნული ხიდი 1953 წელს აშენდა და მას შემდეგ, სარეაბილიტაციო სამუშაოები პირველად ხორციელდება. პროექტის მიხედვით, 152 მეტრი სიგრძის ხიდს სრული რეაბილიტაცია ჩაუტარდება, რის შემდეგაც განახლდება გზის სავალი ნაწილი და ტროტუარები, რეაბილიტირდება თაღების დაზიანებული უბნები, მოაჯირები და პარაპეტები. გაიწმინდება და მოპირკეთდება ფილები და მოეწყობა გარეგანათების სისტემა. თუმცა კიდევ ერთხელ მინდა გავაფრთხილო საზოგადოება, რომ აღნიშნული პროექტის განხორციელებას თან ახლავს გარკვეული დისკომფორტი, კონკრეტულად გადაადგილების თვალსაზრისით როდესაც ამხელა ადგილი იზღუდება გარკვეულ პრობლემას წარმოადგენს ქალაქში, , გვახსოვს რა მდგომარეობა იყო როდესაც ჭავჭავაძის გამზირის რეაბილიტაცია მიმდინარეობდა , გვახსოვს რა ვითარება იყო მელიქიშვილის გამზირის რეაბილიტაციის დროს, ქეთევან დედოფლის რეაბილიტაციის დროს, გვახსოვს რომ იყო გარკვეული პრობლემები და ხელმისაწვდომობა საზოგადოებრივი ტრანსპორტის თვალსაზრისითაც, რა თქმა უდნა როდესაც ასეთი ტიპის სამუშაოებს ასრულებ გარკვეული დისკომფორტი ახლავს.
შეიძლება ადამიანთა ნაწილი ფიქრობს, რომ ამის საჭიროება არ არის და მხოლოდ საგზაო ინფრასტრუქტურის მოწყობა უნდა მოხდეს, ჩვენ ამაზეც ვფიქრობდით, რომ მხოლოდ საგზაო ინფრასტრუქტურა მოგვეწესრიგებინა, თუმცა ეს იქნება წყალში გადაყრილი თანხებით, რომ თუ ჩვენ დღეს არ შევცვლით მიწისქვეშა კომუნიკაციას, ხვალ ახალდაგებულ გზებზე იგივე პრობლემები გვექნება - გზების ჩავარდნა, ამორტიზებული, გადაადგილება პრობლემა და ეს დიდ უკმაყოფილებას გამოიწვევს და რთული იქნება საზოგადოებისთვის ახსნა, რომ გუშინ შენ სარემონტო სამუშაოები აწარმოე და მიწისქვეშა კომუნიკაცია არ გამოგვიცვლია. ამიტომ ერთად უნდა გავიჭირვოთ და უნდა გავაკეთოთ, რაც აუცილებელია და გასაკეთებელია. შეიცვალოს აღნიშნულ მონაკვეთზე ყველა ის კომუნიკაცია, რომელიც დღეს პრობლემას წარმოადგენს და გარკვეული დისკომფორტია, მთლიანად ახალი კომუნიკაციით ჩანაცვლდეს“, - განაცხადა კალაძემ.