ევროკავშირის კანდიდატი ქვეყნის სტატუსის თვითშეფასების კითხვარში რამდენიმე შეკითხვა სადაზღვევო სექტორს ეხება. საქართველოს მთავრობამ უნდა მიუთითოს სექტორის შესახებ არსებული ზოგადი მონაცემები.

მიიღე ინფორმაცია უფრო სწრაფად „კომერსანტის“ Telegram-ზე.

რამდენად აკმაყოფილებს საქართველოს სადაზღვევო ბაზრის მდგომარეობა ევროკავშირის მოთხოვნებს და ხომ არ შექმნის პრობლემას ის გარემოება, რომ სადაზღვევოების მნიშვნელოვან ნაწილს პირდაპირ თუ ირიბად საბანკო სექტორი ფლობს, ამ თემაზე „კომერსანტი“ საქართველოს სადაზღვევო ჯგუფის ხელმძღვანელს და დაზღვევის კავშირის თანათავჯდომარეს არჩილ მორჩილაძეს ესაუბრა.

„რამდენად აკმაყოფილებს ჩვენი სექტორი მათ მოთხოვნებს, ამ თემას უფრო ღრმა ანალიზი სჭირდება, თუმცა ის, რომ ჩვენ ვართ ერთადერთი ქვეყანა ევროპაში, სადაც არ არის სავალდებულო პასუხისმგებლობის დაზღვევა, ამას როგორ შეხედავს ევროკავშირი, ალბათ არ იქნება რთული საპროგნოზო. ასევე ჯანმრთელობის კუთხითაც ჩვენგან განსხვავებით ძალიან ბევრ ქვეყანაში არის სავალდებულო სამედიცინო დაზღვევა. ამ ყველაფერს ემატება უკონკურენტო გარემო, სადაც ბანკთან აფილირებული სადაზღვევოების მოგება მნიშვნელოვნად აღემატება სხვა დანარჩენებს და ეს წლებია არ იცვლება. ვნახოთ, ამ ყველაფერზე ევროკავშირში რა დასკვნას გააკეთებენ. ფაქტია, რომ ვითარება არ არის სახარბიელო და ნუ მოვიტყუებთ თავს“, — ამბობს მორჩილაძე.

ევროკომისარმა ოლივიე ვარჰეიმ საქართველოს საგარეო საქმეთა მინისტრს ილია დარჩიაშვილს ევროკავშირის კანდიდატი ქვეყნის სტატუსის თვითშეფასების კითხვარი 11 აპრილს გადასცა. საქართველოს მთავრობამ გამოაქვეყნა დოკუმენტის ორივე ნაწილი, რომელზე გასაცემ პასუხებზეც დამოკიდებულია საქართველოსთვის EU-ს კანდიდატის სტატუსის მინიჭების საკითხი. ევროკავშირის კანდიდატი ქვეყნის სტატუსის თვითშეფასების შევსებული კითხვარის პირველი ნაწილი ევროკომისიას უკვე გადაეცა, მაისის ბოლომდე კი მეორე ნაწილიც გადაეცემა.