2021 წლის განმავლობაში საქართველოს სადაზღვევო სექტორის მიერ მოზიდულმა პრემიამ პირდაპირი დაზღვევის საქმიანობიდან 772,7 მილიონი ლარი შეადგინა, საიდანაც სამედიცინო (ჯანმრთელობის) დაზღვევის სახეობაში მოზიდული პრემია მხოლოდ 305,5 მლნ. ლარი იყო. დაზღვევის ზედამხედველობის სამსახურის მიერ გამოქვეყნებული ანგარიშის თანახმად, სამედიცინო დაზღვევით საქართველოს მოსახლეობის მხოლოდ 17% სარგებლობს. ეს მონაცემი წლიდან წლამდე ფაქტობრივად არ იცვლება.
სადაზღვევო კომპანია „გლობალ ბენეფიტს ჯორჯიას” გენერალური დირექტორი ნინო კობახიძე „კომერსანტთან“ ამბობს, რომ საცალო გაყიდვების კუთხით ინტერესი ძალიან დაბალია გამომდინარე იქიდან, რომ სამედიცინო დაზღვევა არ არის პოპულარული, რადგან სახელმწიფო დაზღვევა ფარავს კერძო სადაზღვევო კომპანიების პროდუქტს და თუ ადამიანი კერძო სადაზღვევო კომპანიაშია, ვარდება სახელმწიფო დაზღვევიდან, რაც ბარიერს ქმნის.
„სადაზღვევო ბაზარი არ იზრდება, ამის მიზეზი კი გარდა ბოლოდროინდელი კოვიდიდან გამომდინარე პრობლემებისა, ქვეყანაში სავალდებულო დაზღვევის არ დაწყებაა, მიუხედავად ამდენხნიანი დაპირებებისა. მთელ მსოფლიოში ერთადერთი ქვეყანა ვართ სადაც სავალდებულო დაზღვევა კანონის დონეზე არ არის დამტკიცებული, ხოლო ნებაყოფლობით მაქსიმალური მოცულობას უკვე მიაღწია, შესაბამისად წლიდან წლამდე ეს მონაცემი არ იცვლება. გარდა ამისა, როდესაც მოქალაქეს არ აქვს უფლება საყოველთაო დაზღვევას კერძო დაზღვევა დააშენოს, ეს სფერო მეტს ვეღარ გაიზრდება. დიდი იმედი მაქვს, რომ მალე ეს საკითხი მოგვარდება. ვიცი, რომ მესამე პირის პასუხისმგებლობის შესახებ კანონი გადამუშავდა და ზედამხედველობის სამსახური უახლოეს პერიოდში საპარლამენტო დონეზე ამის მიტანას მოახდენს. ვმუშაობთ აქტიურად ამ დაშენების კომპონენტზე, სხვა შემთხევავაში ეს რიცხვები უფრო და უფრო ნეგატივისკენ წავა და ქვეყნის მეორე რიგით ფინანსური სექტორი რომელიც უნდა არსებობდეს ვერ გაძლიერდება.
ავტოდაზღვევის კუთხითაც, ძირითადად კორპორატიული მიმართულებით ხდება აქტიურობა და არც ამ მხრივ შეიცვლება რამე თუ სავალდებულო არ გახდა. ჯანდაცვის სამინისტროს ერთი საყოველთაო დაზღვეული ორჯერ უფრო ძვირი უჯდება ვიდრე სადაზღვევო კომპანიას ერთი ტენდერით დაზღვეული, რადგან სადაზღვევო კომპანიამ იცის მართვა და კლინიკების კონტროლისთვის უფრო მეტი დროს აქვს. სახელმწიფო რაც უფრო სწრაფად გაყოფს და გაუყოფს სადაზღვევო ინდუსტრიას ამ რისკებს, სადაზღვევო ინდუსტრია უფრო სწრაფად დაიწყებს კაპიტალის ზრდას, დასაქმების ზრდას და ქვეყანაში საერთაშორისო პარტნიორების შემოდინებას“, - ამბობს ნინო კობახიძე.
„ჯი პი აი ჰოლდინგშიც“ აცხადებენ, რომ ის ბარიერი, რაც სახელმწიფო პროგრამაში მონაწილეს აქვს ანუ რომ არ შეუძლია კერძო დაზღვევით სარგებლობა, უნდა მოიხსნას მაგალითად ამბულატორიული მედიკამენტების ან დიაგნოსტიკურ ნაწილში, რაც არასრულყოფილად იფარება სახელმწიფო პროგრამით. სადაზღვევო კომპანიების პოზიციაა, რომ ადამიანებს ჰქონდეთ არჩევანის შესაძლებლობა და ჰქონდეთ საყოველთაო ჯანდაცვის პაკეტზე კერძო დაზღვევის „დაშენების“ უფლება. კომპანიაში განმარტავენ, რომ სავალდებულო ჯანმრთელობის დაზღვევის ქვეყნის ჯანდაცვის სისტემის უმნიშვნელვანესი რეფორმა იქნება, რაც როგორც სახელმწიფოს და სადაზღვევო სექტორს ასევე მომხმარებლებს რომ წლიდნა წლამდე ჯიბიდან გადახდების წილი გაზრდის ნაცვლად შემცირდეს.
სადაზღვევო ასოციაციის ხელმძღვანელი დევი ხეჩინაშვილიც ფიქრობს, რომ საყოველთაო წვდომა სამედიცინო სერვისებზე ყველასთვის უნდა იყოს უზრუნველყოფილი, რაც დღეს არ არის. სადაზღვევო ასოციაციის ხელმძღვანელი ამბობს, რომ დღეს ვის რა მომსახურება ეკუთვნის გაუგებარია. მისივე თქმით, საყოველთაო ჯანდაცვის პროგრამის პროდუქტები სადაზღვევო პროდუქტებისგან მნიშვნელოვნად განსხვავდება, ამიტომ უნდა მოხდეს იმ საკითხზე შეთანხმება თუ რა არის საქართველოში მნიშვნელოვანი.
2021 წლის განმავლობაში სამედიცინო (ჯანმრთელობის) დაზღვევის სახეობაში მოზიდული პრემიით ლიდრობდა „ჯიპიაი ჰოლდინგი“ 84.7 მილიონი ლარით და ბაზრის 28% ეჭირა, შემდეგ მოდის სადაზღვევო კომპანია „იმედი L” - 62.1 მილიონი ლარით, მესამე ადგილს კი სადაზღვევო კომპანია „არდი“ იკავებს 47.2 მილიონი ლარით.
ნინო თამაზაშვილი