დანიის ახალი კოალიციური მთავრობა თავდაცვის ხარჯების გაზრდის მიზნით ერთ-ერთი უძველესი ეროვნული დღესასწაულის გაუქმებას აპირებს. ეს პირველი ნაბიჯია ახალი სამთავრობო კოალიციისა, რომლის შექმნაც ერთი დღით ადრე გახდა ცნობილი.
კოალიციის ერთ-ერთი პრიორიტეტია, დაგეგმილზე უფრო სწრაფად გავიდეს მაჩვენებელზე, რომელიც სამხედრო ხარჯებზე მშპ-ს 2%-ის გამოყოფას გულისხმობს. ეს შეესაბამება იმ დაპირებას, რომელიც ნატოს ქვეყნებმა ერთმანეთს 2014 წელს მისცეს, რუსეთის მიერ ყირიმის დაპყრობისა და აღმოსავლეთ უკრაინაში ლოკალური ომის დაწყების შემდეგ.
ყოფილი მთავრობა სამხედრო ხარჯების მშპ-ს 2%-მდე გაზრდას მხოლოდ 2033 წლისთვის აპირებდა, მაგრამ ახალს, უკრაინაზე რუსეთის თავდასხმის გათვალისწინებით, სურს ამის გაკეთება სამი წლით ადრე. ახალ კოალიციურ მთავრობაში პრემიერ-მინისტრად სოციალ-დემოკრატების ლიდერი მეტე ფრედრიქსენი რჩება.
ფრედრიქსენი განმარტავს, რომ 11 ეროვნული დღესასწაულიდან ერთ-ერთის გაუქმება სამხედრო ხარჯების გაზრდას შეუწყობს ხელს, რადგან სამუშაო დღეების რაოდენობის ზრდა, მთლიან შიდა პროდუქტსაც გაზრდის.
გასაუქმებელ დღესასწაულებს შორის არჩევანი დიდი ალბათობით საყოველთაო ლოცვის დღეზე (Store Bededag) შეჩერდება. ეს დანიის სამეფოს ერთ-ერთ უძველეს დღესასწაულია. რომელიც 1686 წელს დაარსდა და აღდგომის შემდეგ მეოთხე კვირის პარასკევს აღინიშნება.
მთავრობის გეგმებმა რელიგიური ორგანიზაციებისა და ბიზნესის მხრიდან კრიტიკა გამოიწვია.
კრიტიკაზე საპასუხოდ, მეტე ფრედერიკსენმა განაცხადა: „ევროპაში ომი მიმდინარეობს და ჩვენ უნდა გავაძლიეროთ ჩვენი თავდაცვა... ეს თითოეული ჩვენგანისგან ცოტა მეტ წვლილს მოითხოვს“.