„ეს რეგულაცია ჩარჩოებში ჩასმას, ან პროდუქტზე ფასის ზედა ან ქვედა ზღვრის დაწესებას არ ითვალისწინებს“ – ამის შესახებ დისტრიბუტორთა ბიზნეს ასოციაციის თავმჯდომარე ივა ჭყონიამ პრემიერის დაანონსებულ საკანონმდებლო ცვლილების კომენტირებისას გაანცხადა, რომელიც „სამართლიანი ვაჭრობის“ შესახებ ევროდირექტივის დანერგვას გულისხმობს.
„იმის გამო, რომ იმპორტიორ კომპანიებს პროდუქციის მაღალ ფასში მიწოდება უწევთ, ბევრი პრობლემა იქმნება, ამის ერთ-ერთ ფაქტორი არის გადაზღვევა. ბოლო წლების განმავლობაში ბაზრიდან არაერთი მოთამაშეა გასული, ამას ემატება ისიც, რომ 2022 წელს დაახლოებით 400-მდე საცალო-სავაჭრო წერტილი დაიკეტა, რაც სადისტრიბუციო კომპანიებს მძიმე ტვირთად აწევს. შესაბამისად, ამ კანონპროექტში ძალიან მნიშვნელოვნად და კარგად არის ჩაშლილი თუ როგორ უნდა იქნეს დაბალანსებული ძალაუფლება ბაზარზე. აქ ერთი რამ არის ხაზგასასმელი, კანონპროექტი, რომლის მიღებაც იგივე ევროდირექტივიდან გამომდინარე გვიწევს, ყველა ქვეყანაში ინდივიდუალურია და მისი პირდაპირ გადმოკოპირება ვერ მოხდება.
ამ კანონპროექტის შემუშავების დროს დისტრიბუტორთა და რითეილერთა ასოციაცია აქტიურად ვიქნებით ჩართული, რომ ბიზნეს საფრთხე არ შეექმნას, კონკურენცია არ შეიზღუდოს და დადებითად აისახოს მოსახლეობაზე. ეს კანონი არ უნდა იყოს ისე გაგებული, რომ მთავრობა ჩაერევა და რაღაცას შეზღუდავს, იმიტომ რომ ვერ შეზღუდავს,“ - აღნიშნა ივა ჭყონიამ.
ჭყონიას განმარტებით არაბრენდირებულ სახალხო პროდუქტზე ფასნამატი, რომელიც ისედაც ძალიან დაბალია, ფიზიკურად ვერ შეიცვლება, მაგრამ კონკრეტული ბრენდის და მარკის პროდუქტებზე შეიძლება რაღაც კონსენსუსი გამოიძებნოს. მისივე თქმით, აღნიშნული კანონპროექტი დადებითად აისახება არა მხოლოდ პირველადი მოხმარების პროდუქტზე, არამედ ზოგადად ბაზარზე ურთიერთობას დაარეგულირებს.
„აქ არ არის ჩაშლილი, რომ მხოლოდ ზეთზე, წიწიბურაზე ან შაქარზე უნდა დარეგულირდეს ფასი. ზოგადად ევროპის ქვეყნებში მიღებულია და დაშიფრულია სოფლის მეურნეობის პროდუქტები და სხვადასხვა სურსათი, შესაბამისად, აქ ვერ მოვიაზრებთ მხოლოდ პირველადი მოხმარების პროდუქტებს. ეს დაარეგულირებს ორ სუბიექტს - სადისტრიბუციო კომპანიებსა და რითეილ სექტორს შორის ურთიერთობას და რაღაც ჩარჩოებში ჩასვამს, რათა ძალიან დაბალი იყოს იმის რისკი, რომ რომელიმე მხარე აღმოჩნდეს საფრთხის ქვეშ და შემდეგ უკვე მოსახლეობაზე გადავიდეს.
ეს თამაშის წესები, რომელშიც ჩვენ აქტიურად ვიქნებით ჩართულები ბაზარს რადიკალურად შეცვლის, ბაზარი უკვე ერთხელ და სამუდამოდ დარეგულირდება და სწორი თამაშის პრინციპით გავყვებით. ეს არავისთვის ტვირთი არ იქნება, ეს უნდა იყოს ბაზრის დამარეგულირებელი, რომელიც მოსახლეობას ყოფას შეუმსუბუქებს,“ - განაცხადა ივა ჭყონიამ.
თაკო კვაჭანტირაძე