ეს დამატებითი წახალისებაა და არა არსებული პრობლემების გადაჭრა - ასე ეხმაურება ინფრასტრუქტურის მშენებელთა ასოციაციის დირექტორი ანა საბახტარიშვილი ,,ბიზნესპრესნიუსთან“ მთავრობის ახალ ინიციატივას. კერძოდ, მთავრობის ახალი ინიციატივით, სამშენებლო კომპანიებს საქართველოს მთავრობის გარანტიით შეუძლიათ დამატებით მოიზიდონ ფინანსური რესურსი ადგილობრივ ბაზარზე, ბანკებიდან.
ანა საბახტარიშვილი ამბობს, რომ ინიციატივა კარგია, თუმცა საჭიროა უფრო მეტი კონკრეტიკა.
,,ირაკლი ღარიბაშვილის მიერ გაჟღერებული ინიციატივა ვერ აღვიქვით პასუხად იმ პრობლემებზე, რაც სექტორს აქვს. ეს უფრო მეტად არის დამატებითი ინიციატივა, რომელიც ახალ პროექტებს წაახალისებს. საგარანტიო ნაწილი, ცხადია იყო პრობლემა, მაგრამ არა ერთადერთი და არა, უმთავრესი. ამასთან ერთად, არის ძალიან ბევრი პრობლემა იგივე სახელმწიფო შესყიდვებთან დაკავშირებით, რომლებიც ხშირად ბუნდოვანია, როგორც პირობებით, ასევე ბუნდოვანია ვინ და რატომ იმარჯვებს. ჩვენს სექტორთან, ვისთან საუბარიც უკვე მოვასწარი ინიციატივის წარდგენამდე, არ ყოფილა კომუნიკაცია. არ ვიცი, შეიძლება დეველოპერებთან იყო.
ახლა, მნიშვნელოვანია, მოხდეს შეხვედრები და მეტი სიცხადე და მეტი დეტალი გავიგოთ რას ემსახურება ინიციატივა და როგორი იქნება დეტალები. იგივე ლარში აღებულ სესხებს შეეხება მხოლოდ, თუ ეს იქნება დოლარში აღებული სესხებზეც და სხვა დეტალები, რომლის ცოდნაც კომპანიებისთვის უმნიშვნელოვანესია“, - განაცხადა ანა საბახტარაშვილმა.
კითხვაზე, რა არის ახლა სექტორისთვის მთავარი პრობლემა, საბახტარაშვილი ამბობს, რომ გაძვირებული სამშენებლო მასალები დღეს სექტორს ყველაზე მეტ წინაღობას უქმნის.
„პანდემიის შემდეგ, ყველაზე აქტუალური ჩვენი სექტორისთვის, სამშენებლო მასალებზე ფასების მკვეთრი ზრდაა. დაკონტრაქტება მოხდა ძველი ფასებით და დღეს დრამატულად არის გაზრდილი ფასი აბსოლუტურად ყველა პროდუქტზე. დაწყებული ძირითადი პროდუქტებით, როგორიცაა არმატურა, ცემენტი და ა.შ. დასრულებული დამხმარე მასალებით. არ აქვს მნიშვნელობა პროდუქცია იმპორტირებულია, თუ ადგილობრივი წარმოების.
ფასის მატება გამოიწვია ორმა ფაქტორმა უმთავრესად კურსის ცვლილებამ და ამას ემატება პანდემიის გამო, საერთაშორისო ბაზრებზე ფასის ცვლილებაც. დღეს, სექტორის მთავარი გამოწვევა ესაა. შესაბამისად, მიგვაჩნია, რომ ამ პრობლემის გრძელვადიანი გადაჭრის გზა სწორედ ინდექსაციის მოდელის დანერგვაა. აღნიშნული მოდელი შესაძლებლობას მოგვცემს, კონტრაქტების ღირებულება სწორედ ბაზარზე არსებული რეალობის მიხედვით შეიცვალოს. გარდა პროექტებისა, რომელიც დამკვეთებმა შეაჩერეს, დიდი რისკია პროექტების იმის გამო შეჩერების, რომ კომპანიები ფასთა სხვაობას უბრალოდ ვერ უძლებენ. როცა კონტრაქტი სხვა ფასების გათვლითაა დადებული და ახლა ბაზარზე სხვა არის“, - ამბობს საბახტარაშვილი ,,ბიზნესპრესნიუსთან“.
შეგახსენებთ, პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა, რომ საქართველოს მთავრობა სამშენებლო სექტორს კიდევ ერთ ინიციატივას სთავაზობს, რომლის მიზანია დარგის მხარდაჭერის პარალელურად, საჯარო კომუნალური ინფრასტრუქტურის მშენებლობის პროცესში დაგეგმილი სახელმწიფო შესყიდვებში კონკურენციის ზრდა, რაც თავის მხრივ დადებითად აისახება როგორც ზოგადად ეკონომიკურ მაჩვენებელზე, ასევე მენაშენეთა დარგის განვითარებაზე.
bpn.ge