ქართული ნატურალური არამალფუჭებადი პროდუქტების მაღაზია „ხურჯინი“ მეექვსე წელია ქართულ ბაზარზეა. როგორც მაღაზიის ერთ-ერთმა დამფუძნებელმა სანდრო ხაჯალიამ „კომერსანტთან“ საუბრისას განაცხადა, აფხაზეთისა და სამაჩაბლოს გარდა, საქართველოს ყველა კუთხის გლეხებთან აქვთ პირდაპირი კომუნიკაცია და უშუალოდ მათგან იღებენ ნატურალურ ქართულ პროდუქციას. სახელწოდებაშიც ეს იგულისხმება - მთელი საქართველო ერთ ხურჯინშია თავმოყრილი.
მაღაზიაში სუნელ-საკმაზების დიდი არჩევანია, გაყიდვაშია ქართული ჩაის 50 სახეობა, კახური და იმერული ჩურჩხელები, ტყლაპები, თითქმის ყველა რეგიონიდან ჩამოტანილი თაფლი, მურაბები, ჩირები, ღვინო, საწებლები, თხილეული, ქართული ნუგბარი და სხვა პროდუქტი.
რუსეთ-უკრაინის ომმა ტურისტულ ნაკადის ზრდასთან ერთად, პროდუქციაზე ფასების ზრდაც გამოიწვია. სანდრო ხაჯალიას თქმით „ხურჯინში“ ქართველი მომხმარებელი უფრო საახალწლოდ და დღესასწაულების პერიოდშია აქტიური, სხვა დროს ტურისტები ჭარბობენ.
მაღაზიაში 60 სახეობის სუნელია გაყიდვაში. 100 გრამი 1-დან 10 ლარამდე ღირს; იმერული ჯანჯუხასა და კახური ჩურჩხელას ფასი 2.5-დან 4 ლარამდეა; 100 გრამი ჩაი - 6.5-დან 10 ლარამდე ღირს.
რუსეთ-უკრაინის ომის დაწყების პირველივე დღეებიდან მაღაზიაში უკრაინის მხარდამჭერი პოსტერები გამოჩნდა.
„რა თქმა უნდა, ჩვენ მხარდაჭერას ვუცხადებთ უკრაინას აგრესორის წინააღმდეგ ბრძოლაში, სხვაგვარად არ შეიძლება. ყველგან საქართველოს, უკრაინის და ჩვენი მეგობარი ქვეყნების დროშები გვაქვს გამოფენილი. პირველი ორი თვე რუსეთის მოქალაქეებს მაღაზიაში არ ვუშვებდით. ამის გამო რამდენიმე ინციდენტიც მოხდა. პოსტერებზე პროტესტს, სადაც რუსული აგრესიაა დაგმობილი, არა მხოლოდ რუსები, ქართველებიც გამოხატავდნენ. რუს კლიენტებს რუსულ ენაზე არ ვემსახურებით. ამის გამო რუსები მაღაზიაში ნაკლებად შემოდიან. ეს ფინანსურად გვაზარალებს, მაგრამ ვცდილობთ მტერს დისკომფორტი შევუქმნათ“, აცხადებს სანდრო ხაჯალია.
ხურჯინი ევროპასა და კანადაში რამდენიმე მაღაზიას ქართული სუნელებით ამარაგებს და ონლაინ-გაყიდვებზეც მუშაობს.
მოამზადა მაკა ბიბილაშვილმა