რუსეთი არ სცნობს სისხლის სამართლის საერთაშორისო სასამართლოს და არ მოაწერა ხელი მის დამფუძნებელ დოკუმენტს - რომის სტატუტს. - აღნიშნული განცხადებით რუსეთის საგარეო საქმეთა სამინისტროს წარმომადგენელი მარია ზახაროვა ჰააგის სასამართლოს მიერ პუტინის დაპატიმრების ორდერის გაცემას გამოეხმაურა.
საერთაშორისო სისხლის სამართლის სასამართლოს გადაწყვეტილებებს ჩვენი ქვეყნისთვის არანაირი მნიშვნელობა არ აქვს, მათ შორის იურიდიული თვალსაზრისით. რუსეთი არ არის სისხლის სამართლის საერთაშორისო სასამართლოს რომის სტატუტის მხარე და არ ეკისრება მასზე ნაკისრი ვალდებულებები, - წერს ზახაროვა სოციალურ ქსელში.
რამდენიმე დღის წინ რუსეთის პრეზიდენტის პრესმდივანმა დმიტრი პესკოვმაც განაცხადა, რომ რუსეთი არ ცნობს ჰააგის სისხლის სამართლის საერთაშორისო სასამართლოს და არ შედის მის იურისდიქციაში.
უკრაინის პრეზიდენტის აპარატის ხელმძღვანელი ანდრეი ერმაკი ჰააგის სასამართლოს გადაწყვეტილებას მოკლედ გამოეხმაურა - „ეს მხოლოდ დასაწყისია“.
უკრაინის გენერალურმა პროკურორმა ანდრეი კოსტინმა განაცხადა, რომ სასამართლოს გადაწყვეტილება არის სიგნალი მსოფლიოსთვის, რომ რუსეთის ხელისუფლება კრიმინალურია.
„ამიერიდან რუსეთის პრეზიდენტს აქვს ეჭვმიტანილის ოფიციალური სტატუსი საერთაშორისო დანაშაულში - უკრაინელი ბავშვების უკანონო დეპორტაციასა და გადაყვანაში. ეს ნიშნავს, რომ რუსეთის ფარგლებს გარეთ პუტინი უნდა დააკავონ და გაასამართლონ. მსოფლიო ლიდერები კი ხელის ჩამორთმევამდე ან მოლაპარაკების მაგიდასთან დაჯდომამდე სამჯერ დაფიქრდნენ, მსოფლიომ მიიღო სიგნალი, რომ რუსეთის რეჟიმი კრიმინალია და მის ხელმძღვანელობასა და მოკავშირეებს პასუხს აგებენ. ეს ისტორიული გადაწყვეტილებაა უკრაინისა და მთელი საერთაშორისო სამართლის სისტემისთვის“ - წერს კოსტინი ფეისბუქის საკუთარ გვერდზე.
2019 წლის ნოემბრის მონაცემებით, 123 სახელმწიფოა რომის სტატუტის მხარე, მათ შორის სამხრეთ ამერიკის ყველა ქვეყანა, ევროპის თითქმის ყველა ქვეყანა, ოკეანეთის უმეტესობა და დაახლოებით აფრიკის ნახევარი. ბურუნდი და ფილიპინები იყვნენ მხარე ქვეყნები, თუმცა დატოვეს შეთანხმება 2017 წლის 27 ოქტომბერს და 2019 წლის 17 მარტს.კიდევ 31 ქვეყანაა ხელმომწერი თუმცა მათ არა აქვთ რატიფიცირებული რომის წესდება.ხელშეკრულების სამართალი ავალდებულებს ამ სახელმწიფოებს თავი შეიკავონ „ქმედებებისგან, რომლებიც ეწინააღმდეგება ხელშეკრულების არსსა და დანიშნულებას“ მანამ, სანამ მათ აქვთ გაწევრიანების სურვილი. ოთხმა ხელმომწერმა: ისრაელმა, სუდანმა,აშშ-მ და რუსეთმა, აცნობეს გაეროს უშიშროების საბჭოს, რომ ისინი აღარ აპირებენ ხელშეკრულების წევრობას და, შესაბამისად, თავისუფლდებოდნენ წესდების სამართლებრივი ვალდებულებებისგან.
დამატებით 41 ქვეყანა არც ხელმომწერია და არც წესდების მხარე. უკრაინამ, რომელიც არც ხელმომწერია და არც მხარე, სისხლის სამართლის საერთაშორისო სასამართლოს იურისდიქცია მიიღო დროებით 2013 წლის ნოემბრიდან.