ესპანელმა მკვლევარებმა პომიდვრის ნარჩენებისგან ბიოპლასტიკა შეიმუშავეს. კვლევა ლა მაიორას სუბტროპიკული და ხმელთაშუა ზღვის მებაღეობის ინსტიტუტში (La Mayora Subtropical and Mediterranean Hortofruticulture Institute-IHSM) ჩატარდა, რომელიც სამხრეთ ესპანეთის საპორტო ქალაქ მალაგაში მდებარეობს.

პორტალ FreshPlaza-ს ცნობით, პომიდვრის ნარჩენებისგან შექმნილ ბიოპლასტიკას კომერციული შეფუთვის პლასტმასის მსგავსი თვისებები აქვს და ზღვაში ერთ თვეში იშლება. ეს გაცილებით მოკლე დრო, ვიდრე 450 წელი, რაც ნავთობისგან მიღებული პლასტმასის დაშლას სჭირდება.

ესპანელმა მეცნიერებმა პომიდვრის ფოთლებიდან, ღეროებიდან და კანიდან, რომლებიც საკონსერვო ინდუსტრიაში ტომატის სოუსის ან კეტჩუპის დამზადების შემდეგ იყრება, ცელულოზა ამოიღეს. მკვლევარებმა ეს ნარჩენები მყარი და გამჭვირვალე ფირის ან პოლიეთილენური შესახვევის შესაქმნელად გამოიყენეს, რაც შესაძლოა, მრავალჯერადად იქნეს გამოყენებული.

IHSM-ის მკვლევარი, ხოსე ალეხანდრო ერედია აცხადებს, რომ ამ ნარჩენებისგან მიღებულ ცელულოზისგან მიიღება მასალა, რომელიც შესაძლოა, ანტიბაქტერიული ბიოაქტიური ნივთიერებებითა და ანტიოქსიდანტებით იქნეს მოდიფიცირებული. მას საკვების შეფუთვის თვისებები აქვს და პლასტმასის კონტეინერებთან შედარებით, მინიმალურ დროში იშლება.

ეს ბიოპლასტიკა შესაძლოა, ჰიდროფობიური, ფლუორესცენტური, მარგალიტისფერი იყოს, ან განსხვავებული ფერები და ჩრდილები ჰქონდეს, რაც სინათლის ზემოქმედებაზე არის დამოკიდებული.

ამ ბიოპლასტიკის გამოყენება „ჭკვიანი შეფუთვის“ დასამზადებლად არის შესაძლებელი. ამ დროს, ანუ საკვების დასაცავად გამოყენებისას, პლასტმასი თავდაპირველ ფერს კარგავს, რადგან ის შთანთქავს წყალს, იწყებს სტრუქტურის, ანტიოქსიდანტური თვისებების დაკარგვას, რაც ერთგვარი სენსორის ფუნქციას ასრულებს და უსარგებლო ხდება. გარდა ამისა, ამ პლასტმასის გამოყენება ქილის შიდა ფენის დასაფარად არის შესაძლებელი.

ხოსე ალეხანდრო ერედიას თქმით, ბიოპლასტმასი ნავთობისგან წარმოებულ პლასტმასს არაფრით ჩამოუვარდება, რადგან ლითონის კოროზიისგან დაცვაც შეუძლია და არც საკვებში იჟღინთება. თუმცა მკვლევარი აცხადებს, რომ ეს ახალი პლასტმასი სექტორში დიდი ხნის განმავლობაში ვერ დაინერგება, რადგან პლასტმასის მრეწველობას უნდა შეეძლოს იგივე მექანიზმების გამოყენება, რათა ეს ცვლილება ეკონომიკურად მომგებიანი იყოს, ეს კი კვების მდგრადობასა და გარემოს დაცვაში რევოლუციის ტოლფასია.

bpn.ge