ესპანეთში აცხადებენ, რომ ქვეყანაში შესაძლოა, კორონავირუსის მეორე ტალღა უკვე დაიწყო. ამის შესახებ განცხადება ესპანეთის ჯანდაცვის სამინისტროში გააკეთეს. ამჟამად ქვეყანაში ინფექციური დაავადების 280 აქტიური კლასტერია აღრიცხული. ბოლო 24 საათში ქვეყანაში „კოვიდ-19“-ის 922 ახალი შემთხვევა გამოვლინდა.

„ეს შესაძლოა იყოს მეორე ტალღა, მაგრამ ეს არ არის ყველაზე მნიშვნელოვანი რამ. ყველაზე მნიშვნელოვანია, თვალი ვადევნოთ მოვლენების განვითარებას, დავადგინოთ რა ზომების მიღებაა აუცილებელი და ეს ზომები დროულად მივიღოთ“, – განაცხადეს ესპანეთის ჯანდაცვის სამინისტროში.

მათივე ინფორმაციით, ბოლო სამ კვირაში ვირუსის გავრცელების ტემპმა სამჯერ მოიმატა, რაც ნიშნავს, რომ „ვირუსის ტალღა აღმავალია“.

ბოლო 14 დღეში მხოლოდ კატალონიაში „კოვიდ-19“-ის 8000 შემთხვევა აღრიცხეს. ამის გამო კატალონიის ჯანდაცვის მინისტრმა მოუწოდა ბარსელონას მოქალაქეებს, საჭიროების გარეშე სახლებიდან გასვლას მოერიდონ.

მადრიდში ადგილობრივმა მთავრობამ განაცხადა, რომ მოქალაქეთა ერთად შეკრებაზე შეზღუდვის დაწესება კვლავ განიხილება.

ამასთან საფრანგეთის ხელისუფლება მოქალაქეებს მოუწოდებს, კატალონიაში გამგზავრებისგან თავი შეიკავონ. ამის მიზეზად ესპანეთის რეგიონში კორონავირუსის შემთხვევათა ზრდა სახელდება.

საფრანგეთის პრემიერ-მინისტრ ჟან კასტექსის თქმით, მთავრობა უახლოეს ხანში გაამკაცრებს უსაფრთხოების ზომებს ქვეყნის საზღვრებზე, ხოლო 16 ქვეყნის მოქალაქეებისთვის ქვეყანაში შესვლის წინ ვირუსის ტესტის ჩატარება სავალდებულო იქნება.

ე.წ. წითელ სიაში არიან: აშშ, ალჟირი, მაროკო, სერბია, მონტენეგრო, თურქეთი, ისრაელი, ყატარი, ინდოეთი, მექსიკა, ბრაზილია და ჩილე.

ამ ქვეყნების მოქალაქეებს ტესტის გაკეთება აეროპორტშივე მოუწევთ.

ბოლო მონაცემებით ჯანდაცვის მსოფლიო ორგანიზაციაში იუწყებიან, რომ ბოლო 24 საათში მსოფლიოში კორონავირუსის შემთხვევათა რიცხვმა რეკორდულად მოიმატა. კერძოდ, გასული დღე-ღამის განამვლობაში გლობალური მასშტაბით ვირუსი 284 196 ადამიანს დაუდგინეს.

ორგანიზაციის ცნობით, აშშ-ში ბოლო 24 საათში ვირუსით ინფიცირების 69 641 შემთხვევა გამოვლინდა, ბრაზილიაში – 67 860, ხოლო ინდოეთში – 49 310.

ბოლოს შემთხვევების რეკორდული ზრდა ჯანდაცვის მსოფლიო ორგანიზაციამ 18 ივლისს დააფიქსირა, მაშინ მსოფლიოში ერთ დღე-ღამეში ვირუსის 259 848 შემთხვევა აღრიცხეს.