საქართველოდან იმაზე მეტი ქართველია გასული, ვიდრე წარმოგვიდგენია, მოსალოდნელი შედეგები შემაშფოთებელია, - ამის შესახებ „კვირის პალიტრას“  დემოგრაფმა ანზორ თოთაძემ უთხრა. მისივე ვარაუდით, შეუქცევადი მიგრაცია ქვეყანას დემოგრაფიულ საფრთხეს უქმნის.

„მიგრაცია და შობადობის შემცირება არის ის ორი ძალიან მნიშვნელოვანი საკითხი, რომელთა უგულებელყოფამ შეიძლება კატასტროფამდე მიგვიყვანოს. უნდა ვაღიაროთ, რომ დღეს ქართველი ერის ყოფნა-არყოფნის საკითხი დგას. თუ დემოგრაფიული ტენდენციები ასე გაგრძელდება, შეიძლება უახლოეს 5-6 წელიწადში საქართველოს ყველა რეგიონი, დიდი ქალაქების გარდა, გაუკაცრიელდეს. არადა, ისტორიულად ქართველი კაცი სამშობლოს, განსაკუთრებული შემთხვევის გარდა, ნებით არ ტოვებდა. საბჭოთა კავშირის დროს ჩატარებული კვლევის მიხედვით, კავშირში მცხოვრები ქართველების 98% საქართველოში ცხოვრობდა, სომხეთში - სომხების მხოლოდ 65%, აზერბაიჯანში კი აზერბაიჯანელების 84%“, - აღნიშნა ანზორ თოთაძემ.

თოთაძის თქმით, გამოსავალი მდგომარეობს იმაში, რომ მიწები უცხოელებზე არ უნდა გაიყიდოს, რადგან  მიწის  გაყიდვა სამშობლოს ღალატის ტოლფასია. მისივე თქმით, დღეს საქართველოში მიწის დიდ მასივებს ჩინელები, არაბები და პაკისტანელები ყიდულობენ,

„მიწისა და სტრატეგიული ობიექტების გაყიდვა ნაციონალებმა დაიწყეს. ქართულ ოცნებაზე ამბობენ, რუსეთუმეები არიანო, და ამ დროს თავად მიჰყიდეს რუსეთს ყველაფერი. სოფლებში საუკეთესო მიწები ისე მიჰყიდეს უცხოელებს, რომ გლეხებს არც ატყობინებდნენ. შესაბამისად, გლეხებს აღარც საძოვრები დარჩათ და აღარც სამარაგო მიწები. მცირემიწიან, დემოგრაფიული პრობლემების მქონე ქვეყანაში ამის გაკეთება ქვეყნის ღალატის ტოლფასია. პასუხისმგებლიან ხელისუფლებას ადგილზე გლეხის დამაგრების მიზნით უფასოდ უნდა გადაეცა მიწები, რომლებიც ოდესღაც ისედაც მათ წინაპრებს ეკუთვნოდათ. ტექნიკითაც თუ დაეხმარებოდნენ, არათუ ქვეყნიდან, სოფლიდანაც არსად წავიდოდა ეს ხალხი. შეიძლება ითქვას, სააკაშვილმა სოფლიდან გააძევა გლეხები. მნიშვნელოვანი პრობლემაა ისიც, რომ დღეს თბილისში უამრავი ახალი კორპუსი შენდება. უამრავი ბინა მზადდება გასაყიდად. ქართველების დაბალი მსყიდველუნარიანობის გამო მოსალოდნელია, რომ კანონში არსებული ხარვეზების, სხვადასხვა ხრიკისა და ფიქციური ქორწინებების შედეგად იქ, ძირითადად, უცხოელები დასახლდნენ. გასაგებია, რომ გლობალიზაციის პროცესია, ისიც მესმის, რომ ადამიანის ეროვნული ნიშნით შეზღუდვა არ შეიძლება, მაგრამ აუცილებლად უნდა გავითვალისწინოთ, რომ ჩვენ პატარა ერი ვართ და დემოგრაფიულად სერიოზული პრობლემის წინაშე ვდგავართ“, - აღნიშნა ანზორ თოთაძემ.

კითხვაზე  შეცვლის თუ  არა დემოგრაფიულ სურათს ბოლო დროს რუსების  საქართველოში შემოდინება, თოთაძე პასუხობს, რომ ეს  ნაკლებად  სავარაუდოა, რადგან საბჭოთა კავშირის დროს  საქართველოში 435 000 რუსი  ცხოვრობდა, 2014 წელს ჩატარებული აღწერით კი ეს რიცხვი 24 000 - ს ჩამოსცდა.

„ჩვენი საზოგადოების ნაწილს, ალბათ, ის აშფოთებს, რომ ქალაქის ქუჩებში დღეს ძალიან ბევრი რუსი გვხვდება, მაგრამ მათ ავიწყდებათ, რომ საქართველოში ბოლო დროს ძალიან განვითარდა ტურიზმი, რუსებს კი დასავლური ქვეყნების დიდ ნაწილში აღარ უშვებენ. ზოგიერთი რუსი აქ ომსაც გამოექცა, უმრავლესობა საქართველოს მხოლოდ სატრანზიტოდ იყენებს.

2014 წლის აღწერის მიხედვით, საქართველოს მოსახლეობის 86% ეთნიკური ქართველია, მხოლოდ 14% იყო არაქართველი ეთნოსი. თუმცა ეს არ ნიშნავს, რომ ეს მაჩვენებელი არ შეიცვლება. თუ პროცესი უმართავი გახდება და ქართველების შეუქცევად ემიგრაციასთან ერთად უცხოელების შეუქცევადი მიგრაცია გაგრძელდება, გაგრძელდება მიწების უცხოელებზე მიყიდვაც. დიდი ალბათობით, ქვეყანაში 20 წლის შემდეგ დემოგრაფიული სურათი შეიცვლება და ეთნიკური ქართველი ეროვნულ უმცირესობაში აღმოჩნდება. თუ ასე გაგრძელდა, საქართველო ერთ დიდ სასაფლაოდ გადაიქცევა“, - აღნიშნა  ანზორ თოთაძემ.

სტატისტიკის ეროვნული სამსახურის მონაცემების მიხედვით, 2022 წლის 1-ლი იანვრის მდგომარეობით საქართველოდან უცხოეთში ემიგრირებული მოქალაქეების რაოდენობამ 99 974 კაცი შეადგინა. ანზორ თოთაძის განმარტებით, ვინაიდან მიგრანტების დიდი ნაწილი ქვეყნიდან არალეგალურად გადის, შეუძლებელია მათი აღრიცხვა.