ევროკავშირის სისხლის სამართლის თანამშრომლობის სააგენტომ (Eurojust) და ევროპოლმა მხარი დაუჭირეს ახალ კოორდინირებულ მოქმედებას თაღლითური ონლაინ საინვესტიციო პლატფორმის წინააღმდეგ, რომლითაც ამ დრომდე, სულ მცირე, 33 000 ადამიანი, დაახლოებით 89 მილიონი ევროთი დაზარალდა. ამის შესახებ Eurojust-ის განცხადებაშია ნათქვამი.

განცხადებაში აღნიშნულია, რომ გერმანიის ხელისუფლების მოთხოვნით, მარტში ორი ოპერაცია ჩატარდა, რომლის დროსაც ხუთი ეჭვმიტანილი დააკავეს. გარდა ამისა, ბულგარეთში, რუმინეთსა და ისრაელში 15 ლოკაციაზე ჩატარდა ჩხრეკა, მათ შორის ხუთი არალეგალური ქოლცენტრი.

Eurojust-მა მხარი დაუჭირა საგამოძიებო მოქმედებებს 2023 წლის იანვარში ონლაინ თაღლითობის სქემის შესახებ ერთობლივი საგამოძიებო ჯგუფის შექმნით და ახალი ქმედებების მოსამზადებლად ორი საკოორდინაციო შეხვედრის ორგანიზებით.

გარდა ამისა, სააგენტომ უზრუნველყო დახმარება დაკავების ორდერების, საგამოძიებო ორდერებისა და ურთიერთსამართლებრივი დახმარების მოთხოვნის აღსრულებაში.

ბულგარეთში, რუმინეთში, საქართველოსა და ისრაელში ევროპოლის სპეციალისტების მხარდაჭერით ჩატარებულ მოქმედებებში 33 გერმანელი პოლიციელი და გამომძიებელი მონაწილეობდა.