ევექსი ჰოსპიტლების ქსელის შემოსავალი ჯანდაცვის მომსახურებიდან 2020 წელს 2019 წელთან შედარებით 33 მლნ ლარით - 255 მლნ-მდე შემცირდა, ხარჯების ზრდის შედეგად კი 29 მლნ-იანი მოგება 31 მლნ ლარიანი ზარალით შეიცვალა. ფინანსური ანგარიშგების თანახმად მინუსში გასვლის ერთ-ერთ უმთავრესი მიზეზი ინგოროყვას კლინიკის იგივე გნკო-ს გასხვისებისგან მიღებული 26 მლნ ლარიანი ზარალი გახდა.
ევექსს ჯანდაცვის მომსახურების თვითღირებულება 2020 წელს 9 მლნ ლარით 160 მლნ-მდე შეუმცირდა, ამავე დროს ხელფასებზე 2 მლნ-ით მეტი 23 მლნ ლარი გასცა. ცვეთის ხარჯი 1.5 მლნ-ით 29 მლნ ლარამდე გაიზარდა, საპროცენტო ხარჯი 2.5 მლნ-ით 28 მლნ ლარამდე.
გასულ წელს აქტივები მკვეთრად 161 მლნ ლარით შემცირდა. ჯანდაცვის მომსახურებიდან მისაღები ანგარიშები 130 მლნ-დან 88 მლნ-მდე შემცირდა, ძირითადი საშუალებები 513 მლნ-დან 407 მლნ-მდე, თუმცა იმავე პერიოდში ფულადი სახსრების მოცულობა 4.5 მლნ-დან 67 მლნ-მდე გაიზარდა. კაპიტალისა და ვალდებულებების ნაწილში ყველაზე მეტად 256 მლნ-დან 175 მლნ-მდე დამატებით შეტანილი კაპიტალი და 132 მლნ-დან 99 მლნ-მდე გაუნაწილებელი მოგება შემცირდა.
სს „ევექსი ჰოსპიტლები“ 2014 წლის 1-ელ აგვისტოს დაარსდა. 2020 წლისა და 2019 წლის 31 დეკემბრის მდგომარეობით, ევექსის 100%-იანი წილის მფლობელი იყო სს „საქართველოს ჯანდაცვის ჯგუფი.“
2020 წლის აგვისტოში ევექსმა გნკო-ს კაპიტალში 40%-იანი წილის თბილისის სახელმწიფო სამედიცინო უნივერსიტეტისთვის მიყიდვის თაობაზე ხელშეკრულებას მოაწერა ხელი. ნასყიდობის მთლიანი ფულადი საზღაური 12 მილიონ აშშ დოლარს შეადგენს. საქართველოს ჯანდაცვის ჯგუფი“ დარჩენილი 10%-იანი წილის გაყიდვას 2021 წელს გეგმავს. 2019 წელს გნკო-ს წილი მთლიან აქტივებში 15%-ს, ხოლო “შემოსავალი პროცენტის, მოგების გადასახადის, ცვეთის და ამორტიზაციის დარიცხვამდე”-ში 11%-ს შეადგენდა.
საქართველოში COVID-19-ის პანდემიის დაწყების შემდეგ, 2020 წლის განმავლობაში ჯგუფმა ფულადი სახსრების დაგროვებისა და შენახვის სტრატეგია განახორციელა. ვირუსის ფართო გავრცელების შემდეგ ჯგუფმა ჯანდაცვის მომსახურების ექვსი ობიექტის მობილიზაცია მოახდინა, სადაც მხოლოდ COVID-იანი პაციენტების მიღება ხდებოდა და ასევე ჯანდაცვის მომსახურების ჰიბრიდული შვიდი ობიექტის მობილიზაცია, რომლებიც ემსახურებოდა როგორც COVIDიან, ისე სხვა პაციენტებს. პანდემიამ სხვა კლინიკების მსგავსად გეგმიური ოპერაციების რიცხვი ევექსის ქსელშიც შეამცირა.
2019 წლის 31 დეკემბრის მდგომარეობით ევექსის ქსელი 9600-ზე მეტ ადამიანს ასაქმებდა. ქსელი საერთო ჯამში 33 კლინიკას აერთიანებს საიდანაც 14 პოლიკნინიკაა, ხოლო 19 მცირე ზომის კლინიკა. ორივე ერთეული პირველად ამბულატორიულ მომსახურებას ახორციელებს. კლინიკების მიმართულებით მომსახურებების სპექტრი უფრო მაღალია და ტარდება მცირე ოპერაციებიც. პოლიკლინიკებში კი პაციენტებს სრული გეგმიური ამბულატორიული მომსახურების მიღება შეუძლიათ.